АҚШ давлат котиби Энтони Блинкеннинг айтишича, Украина ҳукумати ва ҳарбийлари Киевга иттифоқчилар томонидан етказиб берилган Ғарб қуролларини қаерда ва қандай шароитда қўллашни мустақил ҳал қилиш ҳуқуқига эга.
Шунингдек, у Россия томонидан босиб олинган ҳудудларни ўз назорати остига қайтаришнинг энг яхши йўлини Украинанинг ўзи танлаши керак, деб ҳисоблашини айтиб ўтди.
“Таъкидлаш жоизки, Ғарб ҳарбий техникасидан қандай фойдаланиш, уларни қаерда қўллаш ҳақидаги қарорлар фақат украиналиклар томонидан қабул қилинади. Улар ўз ватанларини қандай ҳимоя қилишни, ўз ерларини қандай қилиб энг яхши тарзда қайтариб олишни ҳал қилишлари керак. Биз буни фақат уларнинг ихтиёрига қолдирамиз, бу ҳолатда вазиятга таъсир қилишимиз фақат маслаҳат кўринишида бўлиши мумкин”, — деди Энтони Блинкен.
Шу билан бирга, Блинкен Қўшма Штатлар Украина қуролли кучларининг Россия ҳудудига бераётган зарбаларини “рағбатлантирмоқчи эмас” ва бундай ҳужумларни қўллаб-қувватламаслигини таъкидлади. Бироқ, унинг сўзларига кўра, бу ҳужумларни амалга ошириш бўйича якуний қарор ҳар қандай ҳолатда ҳам Киевда қолади, у бу ҳужумлар қанчалик зарурлигини ҳал қилиши керак.
Жорий йилнинг апрель ойида Германия мудофаа вазири Борис Писториус Украина қуролли кучлари агар улар туфайли тинч аҳоли жабр кўрмаса, Россия ҳудудида ҳарбий амалиётлар ўтказиши мумкинлигини айтган эди. Унинг қайд этишича, назарий жиҳатдан Украина ҳарбийлари бундай операцияларни амалга ошириш учун Ғарб қуролларидан фойдаланиши мумкин.
Писториуснинг сўзларига кўра, Берлин ва “Киевнинг бошқа Ғарб иттифоқчиларининг аксарияти” бунда жиддий таҳдид ёки муаммо кўрмаяпти.
Изоҳ (0)