АҚШ давлат котиби Энтони Блинкен Россия президенти Владимир Путиннинг Украинадан ташқарида ҳам тажовузкор режалари борлигидан огоҳлантирди.
Блинкеннинг қайд этишича, агар унга ғалаба қозонишга имкон берилса, Кремль раҳбари Украина чегараларида тўхтамайди.
“Агар Путиннинг жавобгарликдан қутулиб қолишига йўл қўйсак, эҳтиёткорлигимизни йўқотсак, бу Пандора қутиси очилиб кетишига олиб келади. Дунёнинг бошқа бурчакларидаги бошқа потенциал тажовузкорлар ҳам Путиндан ўрнак олишади”, — деди Блинкен .
АҚШ давлат котибининг сўзларига кўра, бундай сценарий жиддий хавф туғдиради, чунки бу Қўшма Штатларни Россия Федерацияси билан тўғридан тўғри можарога тортиши мумкин.
“Ўйлайманки, Путин Украинага тўлиқ куч билан ҳужум қилади, кейин эса НАТО давлатларига бостириб боради. Агар у Шимолий aльянсга аъзо давлатга ҳужум қилса, биз НАТО шартномасининг 5-моддасига мувофиқ ўша давлатга ёрдам беришга мажбур бўламиз,” — деди Блинкен.
Блинкеннинг айтишича, АҚШ бунга йўл қўймаслик учун ҳамма нарсани қилмоқчи. Шу сабабли президент Жо Байден сўраган 106 миллиард долларлик пакетни Конгресс маъқуллаши жуда муҳим, деди АҚШ давлат котиби.
“Бу абадий уруш эмас, биз учун ҳам бу абадий харажат эмас. Биз Украинага бошқа давлатлар билан ҳамкорлик қилиш орқали ўзини ҳимоя қилишда ёрдам берар эканмиз, мамлакат ҳарбий, иқтисодий жиҳатдан оёққа туришини таъминлашга ҳаракат қилмоқдамиз,” — деди Блинкен.
Шу билан бирга, Блинкен агар Конгресс Украинага ёрдам пули ажратилишини маъқулламаса, бу ҳақиқий муаммо бўлишини таъкидлади. “Украинага ёрдам бериш АҚШ ва иттифоқчиларнинг умумий ишидир, бу иш давом этиши керак”, — деди давлат котиби.
“Ҳозирда Россия Украинада стратегик мағлубиятга учрамоқда. Биз бунинг давом этишидан жуда манфаатдормиз”, — дея қўшимча қилди Блинкен.
Изоҳ (0)