Буюк Британия ва Финляндия БМТнинг Яқин Шарқдаги Фаластинлик қочқинларга ёрдам кўрсатиш агентлигини (UNRWA) молиялаштиришни тўхтатишга қарор қилди. Бу ҳақда Буюк Британия Ташқи ишлар вазирлиги хабар бермоқда.
Европа давлатлари UNRWA ни молиявий кўмакдан маҳрум қилишига унинг айрим ходимлари Исроилга қарши жанговар ҳаракатларда қатнашаётгани ҳақидаги хабарлар сабаб бўлган.
“Ушбу иддаолар синчиклаб текширилгунга қадар UNRWA га барча маблағларни ўтказиш вақтинча тўхтатилади. Биз Ғазо секторидаги одамларга инсонпарварлик ёрдамини етказиш зарурлигига ишонишда давом этамиз”, — дея тушунтирди Британия дипломатлари.
БМТ агентлиги 26 январь куни Исроилга уюштирилган ҳужумларга алоқадорликда гумон қилинган бир неча ходим устидан тергов олиб борилаётганини маълум қилганди.
Исроил расмийлари ташкилотга бу шахслар ҳақида маълумот берган. “Агентликнинг гуманитар ёрдам етказиш қобилиятини ҳимоя қилиш” мақсадида улар билан ҳамкорлик зудлик билан тўхтатилди. Бунинг ортидан АҚШ Давлат департаменти агентликка пул ажратишни тўхтатишга қарор қилди. Худди шундай қарор Канадада ҳам қабул қилинган.
Изоҳ (0)