“АҚШ чегарачиларига ноқонуний миграцияга ёрдам бериш вазифаси юклатилган” — Илон Маск

Америкалик тадбиркор Илон Маскнинг айтишича, АҚШ жанубий чегарасидаги патрул хизматига ноқонуний миграцияга ёрдам бериш вазифаси юклатилган.

“Девор қуриш — бу чалғитувчи манёвр. Бу вазиятни тузатиш учун девор керак эмас. Чегара хизматига АҚШга кенг миқёсдаги ноқонуний киришни осонлаштириш вазифаси юкланган. Асосий муаммо шундаки, ҳар ким ҳеч қандай далилсиз бошпана талаб қилиши мумкин. Бу бутун Ер юзидаги одамлар Америкага келиши мумкинлигини англатади”, — деб ёзди Маск ижтимоий тармоқда.

Байден маъмурияти чегара хавфсизлиги чоралари бўйича Техас ҳукумати билан зиддиятга киришмоқда. Техас расмийлари чегара етарлича қўриқланмаётгани, оқибатда рекорд миқдордаги ноқонуний мигрантларнинг Қўшма Штатларга киришига имкон яратилаётганини таъкидламоқда.

Байден администрацияси, ўз навбатида, маҳаллий ҳокимият органлари томонидан кўрилаётган чораларни конституцияга зид ва ортиқча деб атамоқда.