Исроил бош вазири Биньямин Нетаньяху видеомурожаат орқали қилган чиқишида Исроилнинг Ғазодаги мақсади доимий оккупация эмас, балки ҳудудни “демилитаризация” ва “дерадикализация” қилиш эканини айтди. Бу ҳақда Bild хабар берди.
Шундай қилиб, Нетаньяху биринчи марта ҳукуматнинг айрим ўнг қанот аъзоларининг фаластинликларни Ғазони тарк этишга мажбур қилиш таклифига қарши чиқди.
“Мен бир нечта нарсани аниқроқ тушунтирмоқчиман: Исроил Ғазо секторини доимий равишда оккупация қилиш ёки тинч аҳолини қувиб чиқариш ниятида эмас. Исроил Фаластин аҳолисига эмас, ҲАМАС жангчиларига қарши курашмоқда. Мақсадимиз — Ғазо секторини ҲАМАСдан тозалаш ва гаровга олинганларни озод қилиш. Бунга эришилгандан сўнг, Ғазони қуролсизлантириш ва дерадикализация қилиш, ҳам Исроил, ҳам фаластинликлар учун яхши келажакка имконият яратади”, — деди у.
Bild ҳарбий эксперти Юлиан Рёпкенинг сўзларига кўра, Исроил армияси Ғазо секторининг шимолий қисмида ҲАМАСга қарши операцияни деярли якунлаган.
“8 мингга яқин жангчи йўқ қилинган, 30 мингга яқин қурол қўлга олинган”, — дейди у.
Шимолда ҲАМАС жангчилари Жабалия, Бейт-Лаҳия ва Ғазо шаҳридаги ҳудудларда қаршилик кўрсатишда давом этмоқда.
“Жанубда, биринчи навбатда, Хон Юнис шаҳри учун шиддатли жанглар давом этмоқда. Исроил армияси секторнинг жанубий ярмини яна икки қисмга бўлиб, денгизгача чиқишга муваффақ бўлди”, — деб ёзади Германиянинг Bild нашри.
Аввалроқ АҚШ давлат котиби Энтони Блинкен Ғазо секторидан аҳолининг чиқариб юборилишига қаршилигини таъкидлаганди. Бунга Исроил бош вазирининг яширин музокараларда Мисрга фаластинликларни кўчириш бўйича босим ўтказиш илтимоси сабаб бўлганди. Мазкур хабарлар фонида Блинкен 9 январь куни Нетаньяху билан учрашганди.
Изоҳ (0)