“Тайван мустақиллиги” масаласи Хитой ва АҚШ ўртасидаги муносабатларнинг асосий масаласи ҳисобланади. Бу ҳақда Хитой ташқи ишлар вазири Ван И АҚШ президентининг миллий хавфсизлик бўйича ёрдамчиси Жейк Салливан билан учрашувда маълум қилди.
“Тайван масаласи Хитойнинг ички иши бўлиб, Тайвандаги сайловлар бу ҳудуд Хитойнинг бир қисми экани бўйича ҳақиқатни ўзгартира олмайди. Тайван бўғозидаги тинчлик ва барқарорлик учун энг катта хавф бу “Тайван мустақиллиги” мавзусидаги гап-сўзлар. Хитой ва АҚШ ўртасидаги муносабатларнинг асосий муаммоси ҳам шу масала бўлиб қолди”, — деди у.
Эслатиб ўтамиз, аввалроқ Америка президенти Жо Байден Қўшма Штатлар Тайван мустақиллигини қўллаб-қувватламаслигини тасдиқлаган эди. Шу билан бирга, Оқ уй АҚШ Тайванда тинчлик тарафдори эканини, бироқ минтақага қурол етказиб беришдан бош тортмаслигини ҳам таъкидлаган.
11 январь куни Хитой ТИВ берган баёнотда Тайван масаласи Хитой—Америка муносабатларидаги биринчи қизил чизиқ экани, уни босиб ўтиш мумкин эмаслиги айтиб ўтилганди.
Изоҳ (0)