Ямандаги “Ансар Аллоҳ” ҳаракати Британиянинг Аден кўрфази орқали Қизил денгизга сузаётган Марлин Луанда нефть танкерига ҳужум уюштирганини эълон қилди, деб хабар беради BBC.
Америкалик амалдорларнинг маълум қилишича, ҳужум кемаларга қарши баллистик ракеталар орқали амалга оширилган. Танкер томонидан берилган фалокат сигналига яқин атрофдаги ҳарбий кема жавоб қайтарган.
Ҳужум оқибатида экипаж аъзоларига зарар етмаган. Танкерга операторлик қилган Трафигура компанияси вакилига кўра, нефть олиб кетаётган кема бўлмаларидан бирида ёнғин юзага келган. Бортда ёнғинга қарши ускуналар ишга туширилган.
Трафигура вакилини айтишича, танкер Ғарб давлатлари томонидан ўрнатилган “юқори нарх”дан арзонроқ сотиб олинган Россия нефтини ташиётган бўлган. Кейинроқ АҚШ Марказий қўмондонлиги хусийларнинг кемаларга қарши ракетларига зарба берганини маълум қилди. Америкалик ҳарбийлар ракеталарга Яманнинг хусийлар томонидан назорат қилинадиган ҳудудида дуч келган ва уларни мудофаа мақсадида йўқ қилган.
Яман хусийлари 2023 йилнинг кузидан бошлаб мунтазам равишда Қизил денгиздаги кемаларга ҳужум уюштириб келмоқда. 14 ноябрь куни ҳаракат Исроил билан боғлиқ барча кемаларга ҳужум уюштиришини маълум қилганди.
Аввалроқ АҚШ ва Буюк Британия Ямандаги ҳусийлар базаларига янги ҳужум уюштирганди. Бу сафар яна тўрт давлат, жумладан, мусулмон Баҳрайн Америка ва Британия ҳарбийларига ёрдам кўрсатган.
Изоҳ (0)