Яманнинг катта қисмини назорат қилаётган ҳусийлар Қизил денгизда бир ҳафта ичида учинчи марта Америка савдо кемасига қарата ўқ узди. Аввалроқ АҚШ ва Буюк Британия Ямандаги ҳусийлар базаларига жавоб зарбаларини берганди.
CBS News телеканалига кўра, 18 январь куни маҳаллий вақт билан соат 21:00 атрофида Яман ҳусийлари АҚШга қарашли хусусий савдо кемасига яна ракета зарбаларини берган. Улар Америка компаниясига тегишли бўлган ва Маршалл ороллари байроғини кўтарган Chem Ranger танкерини нишонга олган.
АҚШ Марказий қўмондонлиги маълумотларига кўра, ҳусийлар танкерга иккита кемага қарши баллистик ракета отган, уларнинг ҳеч бири нишонга тегмаган. Кема ва унинг экипажи жабрланмаган.
Бу ҳусийларнинг Қизил денгиздаги Америка кемаларига шу ҳафта бошидан бери учинчи ҳужумидир. Яманнинг катта қисмини назорат қилаётган ҳаракат вакиллари АҚШ ва Британиянинг жавоб зарбаларига қарамай, савдо кемаларига ҳужум қилишда давом этишини билдирганди. АҚШ давлат департаменти ҳусийларни халқаро террорчи гуруҳ деб расман эълон қилди.
Ҳусийлар 2014 йилда фуқаролар уруши натижасида Яманда ҳокимиятни эгаллаб олган шиа гуруҳидир. Улар Сувайш канали орқали юклар ўтадиган Яқин Шарқ учун муҳим транспорт йўлагини ўққа тутмоқда. Бу ҳужумлар Исроил ва Фаластин ўртасидаги можаро билан боғлиқ. Ҳусийларга кўра, шу тариқа улар “Исроил агрессияси учун қасос” олиб, ҲАМАС ҳаракатини қўллаб-қувватламоқда. Шу билан бирга, кўпинча Исроилга алоқаси бўлмаган кемалар, жумладан, тижорат кемалари ўққа тутилмоқда.
Ҳусийларнинг ҳаракатларига жавобан АҚШ ва Буюк Британия ҳаракатнинг Ямандаги базаларига ҳужум уюштирди.
Изоҳ (0)