Машҳур рассом Густав Климтнинг қарийб 100 йил давомида йўқолган деб ҳисобланган сўнгги асарларидан бири Австрия пойтахтида топилди. “Фраулин Лизер портрети” асарининг нархи тахминан 54 миллион долларга баҳоланмоқда.
1918 йилда рассом вафотидан сўнг, портрет буюртмачига — бой яҳудий саноатчилар оиласига берилганди. Асарнинг ягона фотосурати 1925 йилда Венада бўлиб ўтган кўргазма пайтида олинган, ўшанда санъат асари ҳали Лизерлар оиласига тегишли эди. Кейинчалик асарнинг тақдири қандай кечгани номаълум. Бироқ, маълумотларга кўра, 1960 йилларда асар австриялик коллексионерлардан бирининг мулкига айланган ва кейин авлоддан авлодга ўтиб борган.
“Бундай ноёб, бадиий аҳамиятга эга ва қимматли асар Марказий Европа санъат бозорида ўнлаб йиллар давомида бўлмаган. Австрия ҳақида ҳам шундай дейиш мумкин, у ерда бундай қийматга эга бирорта ҳам санъат асари яқин орада аукционга чиқарилмаганди”, — дейилади Kinsky аукцион уйи хабарида.
Густав Климтнинг “Фраулен Лизер портрети” асари 24 апрель куни Лизерлар оиласининг ворислари номидан кимошди савдосига қўйилади. Унгача портрет Буюк Британия, Швейцария, Германия, Гонконг ва бошқа мамлакатлардаги халқаро кўргазмаларда намойиш этилади.
Аввалроқ Густав Климтнинг бошқа бир асари кимошди савдосида катта маблағга сотилган эди. Хусусан, унинг “Елпиғичли хоним” картинаси 2023 йил июнь ойида рекорд даражадаги 108,4 миллион долларга сотилди ва у Европада кимошди савдосида сотилган энг қиммат санъат асарига айланди.
Изоҳ (0)