“АҚШда маҳбуснинг азот билан қатл этилиши бу — шафқатсиз қийноқ” — БМТ Инсон ҳуқуқлари бўйича Олий комиссари

Бирлашган Миллатлар Ташкилотининг Инсон ҳуқуқлари бўйича Олий комиссари Фолкер Туркнинг фикрича, АҚШда маҳбуснинг азот билан қатл этилишини қийноқларга тенглаштириш мумкин.

Европа Иттифоқи давлатлари ҳам азотли қатлни қоралаб, буни “шафқатсиз жазо” деб атади. Инсон ҳуқуқлари кенгаши раҳбари Ева Меркачева ўлим жазоси барча “цивилизациялашган” мамлакатларда тақиқланишига умид билдирди. Кеча 25 январь куни АҚШда 58 ёшли маҳкум азот гази билан қатл этилганди.

“Мен Алабама штатида Кеннет Южин Смитнинг қатл этилганидан чуқур афсусдаман. Бу янги ва синовдан ўтмаган қатл тури шафқатсиз қийноқ бўлиб, ғайриинсоний ва қадр-қимматни камситувчи усулдир”, — деди БМТ Инсон ҳуқуқлари бўйича комиссари.

“Етакчи экспертларнинг фикрига кўра, бу усул ўта шафқатсиз ҳисобланади. Бунинг устига, аввалроқ 2022 йилнинг ноябрида маҳбусни қатл қилишга уриниш муваффақиятсиз чиққанини ҳам унутмаслик керак”, — дейилади Европа Иттифоқи ташқи хизмати баёнотида.

Қайд этилишича, Европа Иттифоқи “ҳар доим ва ҳар қандай шароитда” жазо усули сифатида ўлим жазосига қарши.