Халқаро суд Исроил Ғазо секторида геноциднинг олдини олиш учун барча зарур чораларни кўриши керак деган қарор чиқарди. Исроил бош вазири Биньямин Нетаньяху мазкур қарорга муносабат билдирди. Бу ҳақда Тhe Jerusalem Post хабар берди.
Нетаньяхунинг сўзларига кўра, Исроил Ғазодаги тинч аҳолига эмас, ҲАМАСга қарши уруш олиб бормоқда.
“Исроилнинг халқаро ҳуқуққа содиқлиги собитдир. Мамлакатимиз ва халқимизни ҳимоя қилишда давом этиш бўйича бизнинг муқаддас мажбуриятимиз ҳам худди шундай. Урушимиз фаластинлик тинч аҳолига қарши эмас, ҲАМАС террорчиларига қарши”, — деди Нетаньяху.
У ҳар бир давлат сингари, Исроил ҳам ўзини ҳимоя қилиш ҳуқуқига эгалигини даъво қилди.
“Гаагадаги суд бизни бу ҳуқуқдан маҳрум этиш талабини ҳақли равишда рад этди. Аммо Исроилнинг фаластинликларга қарши геноцид содир этгани ҳақидаги айблов шунчаки ёлғон эмас, балки ҳайратланарлидир. Суднинг буни муҳокама қилишга тайёрлиги авлодлар ўртасида сақланиб қоладиган абадий шармандаликдир.
Биз адолатли уруш олиб бормоқдамиз ва ҲАМАСни мағлуб қилмагунимизча, барча гаровга олинганларни қайтармагунимизча ва Ғазо сектори Исроил давлати учун хавф туғдирмаслигига кафолат бермагунимизча, тўлиқ ғалабагача буни давом эттирамиз”, — деди Исроил бош вазири.
Изоҳ (0)