Tesla бош директори Илон Маск агар савдо тўсиқлари ўрнатилмаса, Хитойнинг автомобиль ишлаб чиқарувчи компаниялари глобал рақобатчиларни “йўқ қилишини” айтди. АҚШ электромобиллар бозори етакчиси бутун дунё бўйлаб ўз иштирокини кенгайтиришга интилаётган BYD каби компаниялар билан рақобатга дуч келаётганини таъкидлади.
Хитой автомобиль компаниялари энг рақобатбардошга айланди ва мамлакатдан ташқарида сезиларли муваффақиятларга эришмоқда”, —деди Маск. “Агар савдо тўсиқлари ўрнатилмаса, улар дунёдаги бошқа автомобиль компанияларини деярли йўқ қилади. Улар жуда яхши”.
Маск ўтган йили Tesla даромадини камайтириш билан инвесторларни хавотирга солиб, нархлар урушини келтириб чиқарганди. 24 январь куни Маск Tesla “харажатларни камайтиришнинг табиий чегарасига” эришаётгани ҳақида огоҳлантирди.
Маскнинг айтишича, унинг компанияси келаси йили янги модел ишлаб чиқаришни бошлайди — Reuters манбалари бу ҳозирги автомобиллардан арзонроқ бўлишини таъкидламоқда.
Тадбиркорнинг ушбу баёноти Tesla сотувлари ўсиши секинлашган ва даромадлар таҳлилчиларнинг прогнозларига мос тушмаётган бир пайтда янгради.
Европа Иттифоқи ўз автомобиль фирмаларини давлат ёрдамидан фойда кўрадиган хитойлик рақобатчилардан ҳимоя қилиш-қилмаслик ҳақида бош қотирмоқда.
Айни пайтда, АҚШ президенти Жо Байден Хитойнинг саноатда ҳукмронлик қилишига йўл қўймаслигини айтган. Унинг бу йилги президентлик сайловларида кутилаётган рақиби Дональд Трамп эса барча импорт товарларига божларни оширишни ваъда қилган.
Изоҳ (0)