Техас губернатори Грег Эбботт штатнинг Мексика билан чегарасини ҳарбий ресурслар ёрдамида муҳожирлардан ҳимоя қилиш ниятида эканини очиқлади. У АҚШ президенти Жо Байден маъмурияти иммиграция қонунларига амал қилмаётганини даъво қилди.
2023 йилда қуйи суд АҚШ федерал ҳукуматига Техас Миллий гвардияси Мексика билан чегарада ўрнатган симли панжараларни олиб ташлашни тақиқлаганди. 22 январь куни АҚШ Олий суди уларни олиб ташлаш тўғрисида қарор чиқарди. АҚШ маъмуриятининг таъкидлашича, тўсиқлар федерал чегара хизматига муҳожирларни ҳибсга олиш ва уларга қонун талабига кўра зарур бўлганда ёрдам кўрсатишга тўсқинлик қилмоқда.
“Президент Байден мигрантларни федерал қонун бўйича ноқонуний равишда мамлакатга киргани учун жиноий жавобгарликка тортиш ўрнига ўз адвокатларини Техасни чегара хавфсизлигини таъминлаш борасидаги саъй-ҳаракатлари учун судга бериш мақсадида федерал судларга юборди”, — деди Эбботт.
Губернаторнинг қўшимча қилишича, давлат ҳокимияти органлари ўзини ҳимоя қилиш ҳуқуқини сақлаб қолади. У ноқонуний муҳожирларга қарши курашни ўзининг конституциявий ваколати деб атади. Техас маъмуриятига кўра, икки йил ичида маҳаллий чегара хизматлари 500 мингга яқин муҳожирни ҳибсга олган.
Изоҳ (0)