АҚШ президенти Жо Байден маъмурияти Конгрессга мактуб йўллаб, Туркияга F-16 қирувчи самолётлари сотилишини “зудлик билан” маъқуллашга чақирди, деб хабар бермоқда Reuters АҚШ расмийларига таяниб. Манбаларга кўра, Байден Туркия Швециянинг НАТОга аъзолик аризасини ратификация қилишни якунлаши биланоқ қирувчи самолётларни сотиш жараёнини бошламоқчи.
Reuters хабарига кўра, мактубда Жо Байден маъмурияти F-16 қирувчи самолётларини (сони кўрсатилмаган) ва улар учун модернизация тўпламларини 20 миллиард долларга сотишни маъқуллашни сўраган. Айни пайтда АҚШ Давлат департаменти Туркияни Швеция аризасини имкон қадар тезроқ ратификация қилишга чақирди, деб қайд этди агентлик.
Давлат департаменти матбуот хизмати раҳбари Ведант Патель 24 январь куни бўлиб ўтган брифингда F-16 самолётларининг Туркияга етказилиши эҳтимоли ҳақида маълумот беришдан бош тортди.
“Конгресс қурол савдосини кўриб чиқишда муҳим рол ўйнайди, бироқ мен Конгрессга расман хабар қилинмагунча, таклиф этилаётган қурол савдосини тасдиқламайман”, — деди у.
Туркия парламенти 23 январь куни Швециянинг НАТОга аъзо бўлишини кўпчилик овоз билан маъқуллади. Шундан сўнг ҳужжат имзолаш учун президент Ражаб Тоййиб Эрдўғонга юборилди. Швециянинг НАТОга аъзолигини тасдиқлаш шартларидан бири Анқарага Америка қирувчи самолётларни етказиб бериш эди: 2021 йил октябрь ойида Туркия Қўшма Штатлардан ўзининг мавжуд ҳарбий самолётлари учун 40 та F-16 қирувчиси ва 79 та модернизация тўпламини сотишни сўраган.
Шундан сўнг америкалик қонунчилар Туркиядаги инсон ҳуқуқлари бузилишини баҳона қилиб, уларнинг сотилишига тўсқинлик қилди. 2023 йил декабрь ойида Жо Байден Ражаб Тоййиб Эрдўғон билан суҳбатда Конгрессга босим ўтказишга ва қонунчиларни F-16 сотилишини маъқуллашга кўндиришга ваъда берди.
Изоҳ (0)