AQSH prezidenti Jo Bayden ma’muriyati Kongressga maktub yo‘llab, Turkiyaga F-16 qiruvchi samolyotlari sotilishini “zudlik bilan” ma’qullashga chaqirdi, deb xabar bermoqda Reuters AQSH rasmiylariga tayanib. Manbalarga ko‘ra, Bayden Turkiya Shvetsiyaning NATOga a’zolik arizasini ratifikatsiya qilishni yakunlashi bilanoq qiruvchi samolyotlarni sotish jarayonini boshlamoqchi.
Reuters xabariga ko‘ra, maktubda Jo Bayden ma’muriyati F-16 qiruvchi samolyotlarini (soni ko‘rsatilmagan) va ular uchun modernizatsiya to‘plamlarini 20 milliard dollarga sotishni ma’qullashni so‘ragan. Ayni paytda AQSH Davlat departamenti Turkiyani Shvetsiya arizasini imkon qadar tezroq ratifikatsiya qilishga chaqirdi, deb qayd etdi agentlik.
Davlat departamenti matbuot xizmati rahbari Vedant Patel 24-yanvar kuni bo‘lib o‘tgan brifingda F-16 samolyotlarining Turkiyaga yetkazilishi ehtimoli haqida ma’lumot berishdan bosh tortdi.
“Kongress qurol savdosini ko‘rib chiqishda muhim rol o‘ynaydi, biroq men Kongressga rasman xabar qilinmaguncha, taklif etilayotgan qurol savdosini tasdiqlamayman”, — dedi u.
Turkiya parlamenti 23-yanvar kuni Shvetsiyaning NATOga a’zo bo‘lishini ko‘pchilik ovoz bilan ma’qulladi. Shundan so‘ng hujjat imzolash uchun prezident Rajab Toyyib Erdo‘g‘onga yuborildi. Shvetsiyaning NATOga aʼzoligini tasdiqlash shartlaridan biri Anqaraga Amerika qiruvchi samolyotlarni yetkazib berish edi: 2021-yil oktyabr oyida Turkiya Qo‘shma Shtatlardan o‘zining mavjud harbiy samolyotlari uchun 40 ta F-16 qiruvchisi va 79 ta modernizatsiya to‘plamini sotishni so‘ragan.
Shundan so‘ng amerikalik qonunchilar Turkiyadagi inson huquqlari buzilishini bahona qilib, ularning sotilishiga to‘sqinlik qildi. 2023-yil dekabr oyida Jo Bayden Rajab Toyyib Erdo‘g‘on bilan suhbatda Kongressga bosim o‘tkazishga va qonunchilarni F-16 sotilishini ma’qullashga ko‘ndirishga va’da berdi.
Izoh (0)