АҚШ президенти Жо Байден туркиялик ҳамкасби Ражаб Тоййиб Эрдўғон билан телефон орқали суҳбатда Американинг F-16 қирувчиларини Анқарага сотиш имкониятини Швециянинг НАТОга кириши мавзуси билан боғлади. Байден журналистларга суҳбат тафсилотлари ҳақида гапириб берди, деб ёзмоқда Reuters.
Америка етакчиси Эрдўғонга қўнғироқ қилиб, Туркияда бўлиб ўтган президентлик сайловларининг иккинчи босқичидаги ғалабаси билан табриклаган. Байденнинг сўзларига кўра, суҳбат чоғида Эрдўғон Анқаранинг АҚШдан F-16 самолётларини сотиб олиш истагини такрорлаган. Бунга жавобан АҚШ президенти Вашингтон Анқарадан Швециянинг НАТОга киришига қарши эътирозлардан воз кечишини истаётганини айтган.
“Мен Эрдўғон билан гаплашдим. Эрдўғонни табрикладим. У ҳануз F-16 га алоқадор қарор қабул қилишни истамоқда. Мен унга Швеция билан (унинг НАТОга кириши бўйича — “Дарё” изоҳи) музокара олиб бормоқчилигимизни айтдим”, — дея Байден келаси ҳафта Эрдоғон билан бу мавзуларда батафсил гаплашишини айтди.
Анқара Американинг F-16 самолётларини сотиб олмоқчи, аммо Швециянинг НАТОга киришига қарши
Туркия АҚШдан 20 миллиард долларлик 40 та F-16 қирувчи самолёти ҳамда ўзидаги эски қирувчиларни модернизация қилиш учун 80 га яқин комплект сўрамоқда. Байден маъмурияти келишувни қўллаб-қувватлашини бир неча бор таъкидлаган бўлса-да, Конгресс эътирозлари туфайли савдо тўхтатилган.
Қўшма Штатлар Туркияга, агар Анқара Швециянинг НАТОга аъзо бўлишига яшил чироқ ёқмаса, F-16 бўйича Конгресс маъқулловини олиш қийин бўлишини билдирган, дейди Reuters манбаси.
Туркия март ойи охирида Финляндиянинг НАТОга киришини тасдиқлади, бироқ Швециянинг аъзолигига эътироз билдиришда давом этмоқда ва Стокгольм “террорчиларга” бошпана бераётганини айтмоқда. Туркиядан ташқари Швециянинг аризаси ҳали Венгрия томонидан ҳам маъқулланмаган.
Шимолий Атлантика альянсининг июль ойида бўлиб ўтадиган Вилнюс саммитида Вашингтон учун устувор вазифалардан бири — Швециянинг НАТОга қўшилиши бўлади.
Изоҳ (0)