Салбий роллари билан томошабинларга яхши таниш бўлган актриса Машҳура Зулфиқорова тасодифан санъатга кириб келган. Тўғрироғи, оилавий низолардан қочиб Тошкентга келади ва қариндошининг таклифига кўра, кино оламига қадам қўяди. Аммо унда ҳеч қачон актриса бўлиш истаги бўлмаганди.
“Тамаддихонада идиш-тавоқ ювганман”
Актриса 1985 йил 3 январда Бухоро вилоятида туғилган. Отаси бош қурувчи бўлса-да, тўрт фарзандини болаликдан меҳнатга ўргатганини яхши эслайди.
-_crHu4nQ.jpg)
— Бундан ҳеч қачон оғринмайман. Ҳақиқатан ҳам болалигимдан оилавий тадбиркорликка жалб этилганман. Отамнинг шахсий чойхонаси бўларди. Шу боис, дарслардан кейин идиш-товоқ ювиш ва официантлик қилган кунларим кўп бўлган. Тошкентга келгач, режиссёр Иброҳим Расуловнинг ассистенти бўлганман. Актрисаларнинг кийимларини дазмоллаш ва чойларидан хабар олиш вазифам эди. Ўша пайтда кўпчиликдан қалбга оғир ботадиган гапларни эшитганман. Чунки баъзи бир инсонлар учун оддий ёрдамчининг қадри бўлмайди. Аммо шукр қиламан, кўп ўтмай мен ҳам актриса сифатида танила бошладим. Қийин кунларни бошдан кечирганим учун ёрдамчиларга оғир гапирмайман, — дейди Машҳура Зулфиқорова.
“Турмуш ўртоғимнинг оиласи мени қабул қилолмади”
Актриса шахсий ҳаётидан панд еган аёллар тоифасига киради. У оила қургач, қийин кунларни бошдан кечирганини қуйидагича эслайди.
— Хўжайиним билан бир-биримизни севиб турмуш қурганмиз. Лекин мен бухоролик бўлганим учун уйидагилари норози бўлган. Нима учун, мен раҳматли отамнинг қаерлик эканлигидан уялишим керак?
2003 йилда тўйимиз бўлди, 2004 йилда қизим туғилди. Лекин улар мени қабул қила олмади. “Бизга ўхшамайди”, деб кўп айтишарди. Мен чидадим, ҳеч кимга кўз ёшимни кўрсатмадим. Қизим уч ёш бўлганида эса “керакмассан” деб кўчага ҳайдашди. Онамга “Қизинг ўғил туғолмайди. Ўғлимга онаси ўпмаганидан олиб берамиз, у ўғил туғиб беради”, —дейишган. Шундан кейин, Аллоҳдан ўғил фарзанд беришини сўраганман. Ўғилли бўлганимдан кейин энди тинч яшаб кетсам керак, деб умид қилдим. Лекин адашган эканман. Таъна-дашномлар давом этди, охири бўлмади, — дейди актриса.
“Мен роль ижро этолмайман”
Аслида актрисанинг Тошкентга келиб қолиши тасодиф бўлмаган. У оилавий низолардан қочиб, ўғли билан Тошкентга келгани ва Миролим Қиличев сабаб кино оламига кириб қолганини қуйидагича хотирлайди.
— Оилам бузилганидан кейин тушкунликка тушиб қолганман. Иккита ёш бола, гап-сўзлар одамни қийнаб қўяркан. Шунда болаларим билан ота уйимдан кетиб, Тошкентга келишга қарор қилганман. Аммо онам қизимни бермаган. “Қиз болани қийнаб қўясан, иш топиб ўзингни ўнглаганингдан кейин олиб кетасан”, деган. Ўғлим эса мен билан келган. Жиянимнинг таниши актёр Миролим Қиличев ҳам ўша пайтда энди танилиб келаётганди. “Кастингларда иштирок этмайсизми, кўринишингиз жуда чиройли”, деб кўп гапирарди. Гапларига ишонмай 3-4 та суратимни берганман ва бир ҳафтадан кейин менга Иброҳим Расулов жамоасидан қўнғироқ қилишган. Видеокастингга борганда “Мен роль ижро этолмайман, иложи бўлса жамоангизга ишга олинг, тажриба орттирай”, деганман. Ўша пайтда яхши режиссёр билан танишганимга минг шукр айтаман, чунки рад жавобини берганида умуман кино оламига қадам қўймаган бўлардим. Ўша пайтлари “Жийда гули” сериали суратга олинаётганди. Келган актёрларга чой дамлардим, кийимларини дазмоллардим, баъзида эса суфлёрлик қилардим, — дейди актриса Машҳура Зулфиқорова.
“Эрим билан юрманг”
Актриса, асосан, салбий ролларда суратга тушади. Унинг иштирокидаги “Дайди қизнинг дафтари” сериали ҳам кўплаб муҳокама ва танқидларга сабаб бўлди. Қаҳрамони Хуршида қизи Тахминани ўзи танлаган тақдир йўлидан юришини ва енгил пул топишини истайди.
— Аслида ижобийга нисбатан, салбий ролни яратиш қийин. Аммо буни ҳамма ҳам тўғри тушунмайди. Экрандаги қиёфангизга қараб, сизни шундай инсон деб биладиганлар ҳам кўп. Яқинда қизиқ воқеа бўлди. Дўконга кирсам бир аёл ёнимга келиб, “Сизни жуда ёмон кўраман, ҳатто эрим сиз суратга тушган сериални кўриб ўтирган бўлса ҳам рашк қиламан”, деб бир оз қўпол муомала қилди. Унга босиқлик билан ҳаётда ҳамма яхши бўлмаганидек, сериалларда ҳам ёмон аёллар бор. Уларнинг ролини кимдир ижро этиши керак-ку, дедим. Бу гапимдан кейин аёл бир оз хижолат бўлиб узр сўради. Бу воқеадан аввал эса Instagram’га машинада тушган расмимни қўйсам, “Эримнинг машинасида нима қиляпсиз? Мени болаларим бор” каби ғалати хабарлар ҳам келганди. Гўёки бундай машина фақат ўша аёлнинг эрида бордек. Бу жуда ғалати ва кулгили ҳолат. Актриса ўз номи билан ижрочи. У ҳаётда ҳам шундай инсон деган гап эса ҳақиқатга тўғри келмайди, — дейди актриса.
“Ижобий роллар муваффақият келтирмади”
Актриса аслида “Ишқ ва андуҳ” фильмидаги ижобий роли билан фаолиятини бошлаган. Аммо у ижобий ролларининг бирортаси муваффақиятли чиқмагани ва унга салбий роллар омад келтиргани ҳақида айтди.
— “Кулба” фильмига қадар бир нечта клип, ролик ва фильмларда суратга тушганман. Аммо ролларимнинг бирортаси кўзга кўринмаган. “Кулба”даги қаҳрамоним қайнотасини уйдан ҳайдаб юборгандан кейин томошабинлар таний бошлаган. Кўпчилик актрисалар ижобий ролга интилишади. Мен эса салбий ролm ижро этсам “яйрайман”. Ҳаётда унчалик ёмон инсон эмасман. Аммо экрандаги имиджим ҳамиша салбий, — дейди актриса Машҳура Зулфиқорова.
“Болаларимнинг отасидан ранжидим”
Актриса икки нафар фарзандини ёлғиз катта қилаётган оналардан бири. У Индира Мифтаҳовага берган интервьюсида ўғли оғир операцияни бошдан кечиргани, аммо отаси қийин вазиятда унинг ёнида бўлмаганидан ранжигани ҳақида гапирди.
— У вазиятда пул эмас, ёнимда туриб далда бўлишга кўпроқ зарурат сезаётгандим. Тасаввур қилинг, ўғлингизни операцияга олиб кириб кетишди, аҳволини билмайсиз, юрагингиз беҳаловат бўлади. Аммо ўша вақтда болаларнинг отаси ёнимизда бўлмади. Мен учун келсин демайман, аммо ўша вақтда фарзанд отасининг далдасига муҳтож бўлади. Уч кундан кейин келди, аммо бу худди поезд ўтиб бўлгандан кейинги ҳолатга ўхшарди, — дейди актриса.
Маълумот учун, Машҳура Зулфиқорова “Комила”, “Хон”, “Муҳаббат ва нафрат” каби фильмлар, “Қора атиргул”, “Заҳарли томчилар”, “Фитна” ҳамда “Дайди қизнинг дафтари” каби сериалларда суратга тушган. Томошабинлар уни салбий образларнинг маҳоратли ижрочиси сифатида яхши танийди.
Изоҳ (0)