Туркия парламенти Швециянинг НАТОга қабул қилиниши ҳақидаги протоколни ратификация қилиш учун овоз берди, деб ёзмоқда Bloomberg. Энди ҳужжат мамлакат президенти Ражаб Тоййиб Эрдўғанга юборилади, у яқин кунларда имзоланиши кутилмоқда.
Шу тариқа Швециянинг Шимолий Атлантика альянсига қўшилиш ҳақидаги аризасини ратификация қилмаган НАТО аъзоси фақат Венгрия бўлиб қолмоқда, деб қўшимча қилди агентлик.
Швеция Финляндия билан бирга 2022 йилнинг ёзида НАТОга аъзо бўлиш учун ариза топширганди. Мамлакатлар Россия қўшинларининг Украинага кенг кўламли босқини фонида альянсга қўшилиш ҳақида қарор қабул қилди. НАТОга аъзо бўлиш учун номзод давлатнинг аризаси альянснинг барча аъзолари томонидан маъқулланиши керак.
Натижада, фақат Финляндия 2023 йил апрель ойида НАТОга қўшилди. Туркия Швециянинг иттифоққа киришига бир қанча шартлар билан қарши чиқди. Хусусан, Анқара Стокгольмдан Туркия ҳукумати террорчиликда айблаётган шахсларни топширишни, шунингдек, Туркия террорчи ташкилот деб ҳисоблаган Курдистон Ишчилар партияси “фаолиятига йўл қўймасликни” талаб қилди. 2023 йил июль ойида Эрдўғон НАТО бош котиби билан музокаралардан сўнг Швециянинг аризасини қўллаб-қувватлашга рози бўлди.
Венгрия расмийлари эса Стокгольмни Будапештни “таҳқирлаш” сиёсатида айблаб, унинг қонун устуворлигига риоя қилмаётганини мунтазам танқид қилмоқда, деб ёзади Deutsche Welle. 2024 йил 23 январда Венгрия бош вазири Виктор Орбан Швециянинг НАТОга аъзо бўлиш истагини муҳокама қилиш учун швед ҳамкасби Улф Кристерссонни Будапештга таклиф қилди. Бунга жавобан Швеция Ташқи ишлар вазирлиги музокаралар учун ҳеч қандай сабаб кўрмаётганликларини билдирди, чунки Венгрия 2022 йил ёзида бўлиб ўтган НАТО саммитида Швецияга ҳеч қандай шартларсиз альянсга қўшилиш таклифини юборган эди.
Изоҳ (0)