Украина армиясида қурол-яроғ ва ўқ-дорилар камайиб бормоқда, деди Пентагоннинг халқаро хавфсизлик масалалари бўйича юқори мартабали расмийси Селест Уолландер. Унинг сўзларига кўра, декабрь ойидан бери Вашингтон Украинага аввалгидек ҳарбий ёрдам юбора олмади.
Уолландер АҚШ бошчилигидаги Украина мудофааси бўйича алоқа гуруҳининг виртуал йиғилишидан сўнг журналистлар билан суҳбатлашди, деб ёзади Politico. Одатда Пентагон бундай учрашувлардан сўнг йирик ёрдам пакетларини эълон қилади, аммо бу сафар бундай эълонлар бўлмади.
“Пентагон 2023 йилнинг кузида Киевга ёрдамни кичикроқ ҳажмларда беришни бошлади, чунки маблағлар тугаб бораётганди. Уолландернинг айтишича, АҚШ ҳамон сўнгги ёрдам пакети ҳисобидан Украинани қурол-яроғ билан таъминламоқда, бироқ ёрдамнинг камайгани Киевнинг режалари ва фаолиятига аллақачон таъсир қилмоқда.
Украина расмийлари Вашингтонга бўлинмаларда ўқ-дорилар камайиб бораётганини маълум қилди, деди Пентагон вакили. Унинг таъкидлашича, департамент “қўшимча чоралар кўриш тўғрисида қарор қабул қилишда олдинга силжиши учун Конгресс саволларига жавоб бериши зарур”.
“Можаро тўхтагани йўқ. Аслида, Россия фаоллигидан келиб чиққан ҳолда, жанглардаги интенсивлик юқорилигича қолмоқда”, — дея қўшимча қилди Уолландер.
Расмий вакилга кўра, Украинага ўқ-дорилар ва артиллерия снарядларидан ташқари қирувчи самолётлар ҳам керак. У Киевни F-16 самолётлари билан таъминлаш бўйича халқаро саъй-ҳаракатларни яхши янгилик деб билишини маълум қилди”, — дейилади Politico нашридаги мақолада.
NBC News хабарига кўра, АҚШ президенти Жо Байденнинг ёрдамчилари Конгресс вакиллари билан ёпиқ учрашувда агар Киевга ёрдам кўрсатиш маъқулланмаса, Россия бир неча ҳафта ёки ой ичида Украина билан урушда ғалаба қозониши мумкинлигини айтган. Оқ уй томонидан таклиф қилинган пакет октябрь ойидан бери тасдиқланишни кутмоқда.
Изоҳ (0)