Европа Иттифоқи давлатлари, жумладан, Германия ва Франция Украинани етарлича қурол-яроғ билан таъминламаганликда бир-бирини кўпроқ айблаб, иттифоқ бирлигини бузиш билан таҳдид қилмоқда. Бу ҳақда Bloomberg хабар берди.
Украина президенти Владимир Зеленский яқинда иттифоқчиларни кўпроқ маблағ ажратишга чақирди ва буни амалга оширмаслик Россия президенти Владимир Путинга фойда келтиришини ва Ғарб хавфсизлигига таҳдид солишини айтди.
“Можаро Украина учун ноқулай вақтда юз бермоқда, чунки Киевга ёрдам бериш шубҳа остида қолмоқда, сабаби АҚШ ва Европа Иттифоқининг 100 миллиард доллардан ортиқ маблағи сиёсий зиддиятлар туфайли ушлаб турилибди. Германия канцлери Олаф Шольц ва Франция президенти Эммануэл Макрон бу масалани Берлинда муҳокама қилишлари кутилмоқда”, — дейилади хабарда.
Маълумки, Германия Еврокомиссиядан Украинага режалаштирилган молиявий ва ҳарбий ёрдамни кўриб чиқишни талаб қилмоқда.
“Германия бошчилигидаги аудит бўйича музокаралар 1 февралдаги фавқулодда саммит олдидан бўлиб ўтади. Унда етакчилар Венгрия декабрда блоклаган Украинага 50 миллиард евролик ёрдам пакети бўйича келишиб олишга ҳаракат қилади”, — деб эслайди ОАВ.
Украинага Европа ёрдами муҳим аҳамият касб этади, чунки АҚШнинг молиялаштириши Конгрессда блоклаб қўйилган. Киев эса март ойидаёқ қурол танқислигидан азият чека бошлаши мумкин.
Изоҳ (0)