Сречко Катанес: “Қайси ўринни эгаллаб плей-оффга чиқишимизнинг аҳамияти йўқ”

Футбол бўйича Ўзбекистон терма жамоаси Осиё Кубогидаги учинчи ўйини Австралияга қарши бўлади. Учрашув 23 январь куни бўлиб ўтади.

Ўйин олдидан Ўзбекистон терма жамоаси бош мураббийи Сречко Катанес ҳамда терма жамоа аъзоси Одилжон Ҳамробеков иштирокида матбуот анжумани бўлиб ўтди.

Айтарли ҳеч қандай гап йўқ. Биз ўйинга тайёрмиз. 

Австралия дастлабки икки баҳсда бир-биридан фарқ қилувчи услубга эга жамоалар билан нормал ўйин кўрсатди. Рақиб жарима майдони яқинида бемалол ҳаракат қилишди. Биз бунга йўл қўймаймиз. Улар ўйинни яхши ташкил қилишади, стандарт вазиятларда жуда хавфли. Бу жиҳатларга кўпроқ урғу беришимиз керак. Австралияликлар агрессив ўйин кўрсатишади. Энг муҳими футболчилар ҳар қандай вазиятга тайёр туришлари керак. Ўйлайманки, ўз имкониятларимиздан унумли фойдаланамиз.

Қайси ўринни эгаллаб плей-оффга чиқишимизнинг аҳамияти йўқ. Кейинги босқич учун рақиб танлаб, ҳисоб-китоб қилиш яхши оқибатларга олиб келмайди. Футболчилардан доимо профессионал бўлишни талаб қилганман. Ўйлашимча, кейинги босқичда бошқа жамоалар ҳам бизга рақиб бўлишдан хурсанд бўлмайди. Бироқ ўйин натижаси жуда кўп жиҳатларга боғлиқ. 

Афсуски, Шерзод Насруллаев эртанги баҳсни ўтказиб юборади. Биз катта эҳтимол билан плей-офф масаласини ҳал қилиб бўлдик, йигитларга босим юкламаймиз. Албатта, ҳар қандай рақибга қарши ўз ўйинимизни кўрсатишга ва ғалаба қозонишга ҳаракат қиламиз ва бор кучимизни майдонда кўрсатамиз.  

Сречко Катанес, Ўзбекистон терма жамоаси бош мураббийи

Мусобақа юқори савияда, қизиқарли натижалар билан давом этмоқда. Эртанги ўйинга келадиган бўлсак, бизни қитъамизда ўз ўрнига эга, яхши шаклланган жамоага қарши ўйин кутиб турибди. 

Жамоани кайфияти яхши. Ўтган ўйиндаги ғалаба ҳам бунга туртки бўлди. Ҳар бир нарсани яхши ёки ёмон натижасининг қачондир барибир охири бўлади. Эртага жамоа билан ёмон анъаналарни бузиш учун ҳаракат қиламиз. 

Бундай нуфузли мусобақага келишдан олдин ҳар бир терма жамоа ўз олдига юқори мақсадларни қўйиб, тайёргарлик билан келади. 90 дақиқа давомида ҳар қандай натижани ҳар қандай жамоадан кутиш мумкин. Мавқе жиҳатидан паст жамоалар юқоридаги жамоаларга қийинчилик туғдириши мумкин. Ўйинга келадиган бўлса, дуранг бўлса у, ютсак бу жамоа билан ўйнаймиз деб ўйлашга вақт бўлмайди. Ҳамма бор кучини бериб, ҳар бир учрашувни ютишга ҳаракат қилади. 

Одилжон Ҳамробеков, Ўзбекистон терма жамоаси футболчиси

Матбуот анжумани видеосини бу ердан кўриш мумкин.

Эслатиб ўтамиз, Ўзбекистон ва Австралия ўртасидаги учрашув 23 январь куни 16:30 да старт олади.