Futbol bo‘yicha O‘zbekiston terma jamoasi Osiyo Kubogidagi uchinchi o‘yini Avstraliyaga qarshi bo‘ladi. Uchrashuv 23-yanvar kuni bo‘lib o‘tadi.
O‘yin oldidan O‘zbekiston terma jamoasi bosh murabbiyi Srechko Katanes hamda terma jamoa a’zosi Odiljon Hamrobekov ishtirokida matbuot anjumani bo‘lib o‘tdi.
Aytarli hech qanday gap yo‘q. Biz o‘yinga tayyormiz.
Avstraliya dastlabki ikki bahsda bir-biridan farq qiluvchi uslubga ega jamoalar bilan normal o‘yin ko‘rsatdi. Raqib jarima maydoni yaqinida bemalol harakat qilishdi. Biz bunga yo‘l qo‘ymaymiz. Ular o‘yinni yaxshi tashkil qilishadi, standart vaziyatlarda juda xavfli. Bu jihatlarga ko‘proq urg‘u berishimiz kerak. Avstraliyaliklar agressiv o‘yin ko‘rsatishadi. Eng muhimi futbolchilar har qanday vaziyatga tayyor turishlari kerak. O‘ylaymanki, o‘z imkoniyatlarimizdan unumli foydalanamiz.
Qaysi o‘rinni egallab pley-offga chiqishimizning ahamiyati yo‘q. Keyingi bosqich uchun raqib tanlab, hisob-kitob qilish yaxshi oqibatlarga olib kelmaydi. Futbolchilardan doimo professional bo‘lishni talab qilganman. O‘ylashimcha, keyingi bosqichda boshqa jamoalar ham bizga raqib bo‘lishdan xursand bo‘lmaydi. Biroq o‘yin natijasi juda ko‘p jihatlarga bog‘liq.
Afsuski, Sherzod Nasrullayev ertangi bahsni o‘tkazib yuboradi. Biz katta ehtimol bilan pley-off masalasini hal qilib bo‘ldik, yigitlarga bosim yuklamaymiz. Albatta, har qanday raqibga qarshi o‘z o‘yinimizni ko‘rsatishga va g‘alaba qozonishga harakat qilamiz va bor kuchimizni maydonda ko‘rsatamiz.
Srechko Katanes, O‘zbekiston terma jamoasi bosh murabbiyi
Musobaqa yuqori saviyada, qiziqarli natijalar bilan davom etmoqda. Ertangi o‘yinga keladigan bo‘lsak, bizni qit’amizda o‘z o‘rniga ega, yaxshi shakllangan jamoaga qarshi o‘yin kutib turibdi.
Jamoani kayfiyati yaxshi. O‘tgan o‘yindagi g‘alaba ham bunga turtki bo‘ldi. Har bir narsani yaxshi yoki yomon natijasining qachondir baribir oxiri bo‘ladi. Ertaga jamoa bilan yomon an’analarni buzish uchun harakat qilamiz.
Bunday nufuzli musobaqaga kelishdan oldin har bir terma jamoa o‘z oldiga yuqori maqsadlarni qo‘yib, tayyorgarlik bilan keladi. 90 daqiqa davomida har qanday natijani har qanday jamoadan kutish mumkin. Mavqe jihatidan past jamoalar yuqoridagi jamoalarga qiyinchilik tug‘dirishi mumkin. O‘yinga keladigan bo‘lsa, durang bo‘lsa u, yutsak bu jamoa bilan o‘ynaymiz deb o‘ylashga vaqt bo‘lmaydi. Hamma bor kuchini berib, har bir uchrashuvni yutishga harakat qiladi.
Odiljon Hamrobekov, O‘zbekiston terma jamoasi futbolchisi
Matbuot anjumani videosini bu yerdan ko‘rish mumkin.
Eslatib o‘tamiz, O‘zbekiston va Avstraliya o‘rtasidagi uchrashuv 23-yanvar kuni 16:30 da start oladi.
Izoh (0)