“Путинсиз Россия”: Навальний тарафдорлари дунёнинг турли мамлакатларида митинг ўтказди (фото)

21 январь куни дунёнинг турли мамлакатларида россиялик сиёсатчи Алексей Навальний заҳарланиб, Россияга қайтганининг уч йиллигига бағишланган “Путинсиз Россия” акцияси бўлиб ўтди.

Навальний жамоасига кўра, норозилик намойишлари Австралия, Янги Зеландия, Арманистон, Литва, Польша, Эстония, Германия, Ирландия ва Грузияда бўлиб ўтган. Иштирокчилар Владимир Путин ва Украинадаги урушга қарши, шунингдек, Навальний ва бошқа сиёсий маҳбусларни қўллаб-қувватловчи плакатларни кўтариб келган.

Энг кўп одамлар иштирокидаги акциялар Германияда бўлиб ўтди. Deutsche Welle рус хизмати Берлиндаги Бранденбург дарвозасидаги митингга бир неча юз киши келганини, Кёльнда эса икки юзга яқин одам иштирок этганини ёзади.

“Путинсиз Россия” веб-сайти маълумотларига кўра, норозилик намойишлари 40 та мамлакатда ўтказилиши режалаштирилган.

Эслатиб ўтамиз, “Новичок”дан заҳарланган Алексей Навальний Германияда бир неча ой даволаниб, 2021 йил 17 январь куни Россияга қайтганди. У аэропортда ҳибсга олинган. 2023 йил августида Навальний “экстремизм” иши бўйича “алоҳида режим” колониясида 19 йилга қамалди.