Россияда Навальний тарафдорлари фонарлар билан кўчага чиқиб флешмоб уюштирди

Москвада, шунингдек, яна бошқа шаҳарларда ҳам мухолифатчи Алексей Навальнийни қўллаб-қувватлаб флешмоблар ўтказилди: одамлар кечқурун кўп қаватли уйлар ҳовлисига чиқиб, ўз мобил телефонларидаги фонарларни ёқди, деб хабар беради «РБК». Акциялар «Севги қўрқувдан кучли» деган умумий ном остида бўлиб ўтди.

Акцияларда Москва, Санкт-Петербург, Краснодар, Новосибирск, Омск, Екатеринбург ва бошқа шаҳарлардаги аҳолининг бир қисми қатнашди.

15 февраль ярим тунга келиб, Twitter’да #севгиқўрқувданкучли хештеги остида 28,5 мингта, Instagram’да эса 10,2 мингта пост йиғилди.

Шу куни Москва марказида бирдамлик занжирига ҳам тизилишди. Унинг иштирокчилари шу тариқа аввалги намойишларда қатнашиб, Сахарово қишлоғидаги изоляторга тушган кишиларни, шунингдек, Навальнийнинг рафиқаси Юлияни қўллаб-қувватлашини билдирди. Шундай акция Петербургда ҳам бўлиб ўтди.

Эслатиб ўтамиз, россиялик мухолифатчи Алексей Навальний штаблари раҳбари Леонид Волков сиёсатчининг сафдошлари 14 февраль куни норозилик акциясини ўтказишни режалаштираётганини маълум қилган, «Россиянинг катта шаҳарлари»да яшовчиларга кечқурун ҳовлига чиқиб, телефонларидаги чироқларни ёқиш ва шу ҳолатда бир неча дақиқа туриш таклиф этилган эди. Сўнг акцияда суратга тушиб, уни ижтимоий тармоққа жойлаш лозим. «Ҳеч қанақа ОМОН, ҳеч қанақа қўрқув бўлмайди. Балки, сизга бу 15 дақиқа ҳеч нарсани ўзгартирмайдигандек кўриниши мумкин. Аслида эса у ҳамма нарсани ўзгартиради», — деб ёзганди Волков.

14 февралдаги акциялардан икки кун аввал Москва полицияси фуқароларга рухсат берилмаган норозилик намойишларига чиқмасликни тавсия қилган ва бундай тадбирларда қатнашганлик учун маъмурий жавобгарлик, баъзи ҳолларда эса жиноий жавобгарлик кўзда тутилганини эслатди.

Берлиндан Москвага қайтганидан сўнг дарҳол ҳибсга олинган Алексей Навальнийни қўллаб-қувватловчи акциялар 23 ва 31 январь кунлари Россиянинг кўплаб шаҳарларида бўлиб ўтди. Норозилик акцияларида рекорд даражада кўп одам қўлга олинди, ўнлаб жиноят ишлари қўзғатилди.

2 февраль куни суд «Ив Роше» иши бўйича Навальнийга чиқарилган шартли муддатни ҳақиқийсига ўзгартириш ҳақида қарор қабул қилганидан кейин сиёсатчининг тарафдорлари Москва марказида акция уюштирди, унинг иштирокчилари ҳам полиция томонидан қўлга олинди. 5 февраль куни Леонид Волков яқин вақтлар ичида Навальнийни қўллаб-қувватлаб намойишлар ўтказилмаслигини эълон қилди. 8 февраль куни эълон қилинган мурожаатда ҳам Волков яқин орада норозилик акциялари режалаштирилмаётганини айтган эди.