Тошкент шаҳрида тадбиркорнинг 220 миллион сўмлик мулкини ўзлаштирган собиқ ҳисобчи аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Яккасарой туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Тадбир давомида “Л.П.” МЧЖ собиқ ҳисобчиси Ф.М. МЧЖ номидан шартнома тузишга берилган ваколатдан фойдаланиб, “Ҳ-П.” МЧЖдан харид қилинган 17,5 тонна металл маҳсулотларини кирим қилмасдан бошқа шахсларга нақд пулга сотиб юбориб, тадбиркорнинг 220 миллион сўмлик мулкини ўзлаштириш йўли билан талон-торож қилганлиги аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент шаҳар Миробод туманида мажбурий бадал ва ижара учун ундирилган маблағни ўзлаштирган ширкат аниқлангани, Тошкент туманида МЧЖ масъуллари 2,1 млрд сўмлик кредит ва субсидия маблағларини ўзлаштиргани, Қорақалпоғистонда кўмир сотиб олиш учун ажратилган маблағларни талон-торож қилган МЧЖ раҳбарига жиноят иши очилгани тўғрисида хабар берилганди.
Изоҳ (0)