27 октябрь куни Латвиянинг Рига шаҳрида Ўзбекистон фахрий консуллигининг тантанали очилиш маросими бўлиб ўтди, деб хабар бермоқда “Дунё” АА мухбири.
Маълум қилинишича, Ригадаги Ўзбекистон Савдо уйи раҳбари, Outdoor Media компанияси асосчиси ва директори Владимир Галпэрин Ўзбекистон фахрий консули этиб тайинланди. Бу Ўзбекистоннинг Балтиядаги биринчи фахрий консуллигидир. Тантанали тадбирда унга тегишли консуллик патенти топширилди.
Янги фахрий консул Латвияда бўлиб турган Ўзбекистон фуқароларининг ҳуқуқ ва манфаатларини ҳимоя қилишга кўмаклашиш, иқтисодий ҳамкорликни ривожлантириш, латвиялик сармоядорлар ва сайёҳларни республикага жалб этиш, Ўзбекистонда ишлаб чиқарилган маҳсулотларни Латвия ва бошқа Балтия давлатлари бозорларига экспортини кўпайтириш жараёнларида фаол иштирок этади.
Шунингдек, меҳнат миграциясини тартибли ташкил этиш, маданий-гуманитар ва бошқа алоқаларни ривожлантиришга кўмаклашади.
Ҳозирги кунда хорижда Ўзбекистоннинг 30 га яқин фахрий консулликлари фаолият кўрсатмоқда.
Изоҳ (0)