Хоразм вилояти Шовот туманида дарахтлар кесиб, ёқиб юборилиши оқибатида 756 млн сўм зарар етказилди. Бу ҳақда вилоят Экология бошқармаси ахборот хизмати хабар берди.
Туманнинг “Гулистон” маҳалласида жойлашган “А.Л” фермер хўжалиги ҳудудида жами 119 туп ҳар хил турдаги ва ўчамдаги манзарали дарахтлар кесиб олингани ҳамда 19 туп ҳар хил турдаги манзарали дарахтларни ўсишдан тўхтамайдиган ва тўхташ даражасида шикаст етказилгани ҳамда ёқиб юборилгани аниқланди.
Бу билан “Табиатни муҳофаза қилиш тўғрисида”ги қонуннинг 21-моддаси, “Ўсимлик дунёсини муҳофаза қилиш ва ундан фойдаланиш тўғрисида”ги қонунниг 37-моддаси ва “Атмосфера ҳавосини муҳофаза қилиш тўғрисида”ги қонуннинг 20-моддаси талаблари бузилган.
Вазирлар Маҳкамасининг 2022 йилдаги “Давлат ўрмон фондига кирмайдиган дарахтлар ва буталарни экиш, парвариш қилиш ва улардан фойдаланиш тартибини янада такомиллаштириш тўғрисида”ги қарори билан тасдиқланган “Давлат ўрмон фондига кирмайдиган дарахтлар ва буталарни экиш, парвариш қилиш ҳамда улардан фойдаланиш тартиби тўғрисида”ги низомнинг 4-иловасига асосан табиатга етказилган зарар 456 миллион 20 минг сўмни, етказилган зарарнинг ундириш суммаси 756 миллион 200 минг сўмни ташкил қилди.
Ҳолат юзасидан Жиноят кодексининг 198-моддаси 3-қисми билан экинзорларни, ўрмонларни, дарахтларни ёки бошқа ўсимликларни қастдан шикаслантириш, пайхон қилиш, нобуд қилиш ва кўп миқдорда зарар етказишга сабаб бўлгани ҳолати юзасидан жиноят иши қўзғатилди.
Изоҳ (0)