Самарқандда 15 ноябрь куни БМТнинг Чўлланишга қарши кураш тўғрисидаги конвенция си (CRIC-21 UNCCD) ижросини кўриб чиқиш қўмитасининг 21-сессияси ялпи мажлис бўлиб ўтди, деб хабар бермоқда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.
“Ўзбекистон учун кучайиб бораётган қум ва чанг бўронлари муаммоси ҳар қачонгидан ҳам долзарбдир. Чунки мамлакат ҳудудининг катта қисми дашт ва чўллардан иборат. Ушбу муаммоларни ҳал қилиш учун барча даражаларда комплекс чора-тадбирлар кўриш керак. Бу масалани Ўзбекистон Республикаси президенти Шавкат Мирзиёев шахсан назорат қилиб бормоқда, — деди тадбирда нутқ сўзлаган вазирлик раҳбари Азиз Абдуҳакимов.
Хабарда айтилишича, БМТнинг чўлланишга қарши кураш бўйича конвенция си ижрочи котиби Иброҳим Тиау ҳам сўзга чиқиб, қум ва чанг бўронлари барқарор ривожланишга эришиш учун катта муаммо туғдираётганини, бироқ бу хавфни янада оғирлаштириш ҳам, бартараф этиш ҳам инсонларнинг қўлида эканини таъкидлади.
Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Гидрометеорология илмий-тадқиқот институти ходими Баҳриддин Нишонов ҳаво ифлосланишини мониторинг қилишнинг замонавий тизимлари муҳим эканлигини қайд этди.
“Тадқиқотларга кўра, Марказий Осиё ва Хитой атмосферага чанг чиқариш бўйича дунё миқёсида (Саҳройи Кабир чўлидан кейин) иккинчи ўринда туради – бу умумий миқдорнинг тахминан 20 фоизига тенг”, — деди у.
Баҳриддин Нишонов Ўзбекистонда шаҳар ва аҳоли пунктларининг атмосфера ҳавосидаги чанг ва майда дисперс заррачаларнинг (ПМ1, ПМ2,5, ПМ10) кўриш диапазони ва концентрациясини реал вақт режимида кузатиш имконини берувчи автоматик метеорологик станциялар ва ҳавонинг ифлосланишини автоматик назорат қилувчи станциялар ўрнатилганини, чанг ва қум бўронларини кузатиш ва прогноз қилиш имкониятларини кучайтириш ушбу ҳодисаларнинг салбий оқибатларини камайтиришга ёрдам беришини ҳам айтди.
БМТнинг Чўлланишга қарши кураш тўғрисидаги конвенция сига (UNCCD) кўра, қум ва чанг бўронлари етарлича эътибор берилмаган муаммо бўлиб, ҳозирда дунёнинг баъзи жойларида “сезиларли даражада” кенг тарқалган.
Ҳар йили атмосферага Гизадаги 350 та пирамида оғирлигига тенг бўлган икки миллиард тонна қум ва чанг тарқалади. UNCCD экспертларининг фикрича, бу ҳодисанинг 25 фоиздан ортиғи инсон фаолияти билан боғлиқ. Зарар Шимолий ва Марказий Осиёдан Саҳройи Кабир, жанубий Африкагача бўлган мамлакатларда содир бўлади, уларнинг инсон саломатлигига таъсири ҳали ҳам етарлича баҳоланмаган.
Изоҳ (0)