Пойтахтда дарахтлар кесилиши давом этаётгани сабабли Тошкент шаҳар экология бошқармаси ваколатлари 1 февралга қадар чекланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмат хабар берди.
Таъкидланишича, пойтахтда мораторий талабларига тўлиқ риоя этилмаётгани, аҳоли томонидан дарахтларнинг кесилиши борасида кўплаб эътирозлар билдирилаётгани, қонунчиликка амал қилинмасдан дарахтларни кесишга ёки кўчиришга қайта-қайта рухсатнома берилаётгани сабабли Экология вазирлиги 2024 йилнинг 1 февралига қадар Тошкент шаҳар экология бошқармаси ваколатларини чеклашига тўғри келди.
Шунингдек, Тошкент шаҳар экология бошқармаси бошлиғи фаолиятига хизмат текшируви тайинланди ва у 2024 йилнинг 1 февралига қадар ишдан четлаштирилди.
Вазирнинг буйруғига асосан хизмат текшируви давомида бошқарманинг барча таркибий бўлинмалари раҳбарлари, ходимларининг фаолияти ҳамда 2021–2023 йиллар давомида бошқарма томонидан давлат ўрмон фондига кирмайдиган ерларда дарахтлар ва буталарни кесишга берилган рухсатномаларнинг қонунийлиги ва асослари ўрганилади.
Вазирлик Тошкентнинг Юнусобод туманида эман дарахтига қурувчилар томонидан шикаст етказилгани ҳақида таралган хабарлар бўйича ҳам муносабат билдирди.
Маълум қилинишича, Тошкент шаҳар экология бошқармаси томонидан ўрганиш ишлари олиб борилганида Max Processing МЧЖ мансабдор шахслари томонидан бир дона эман дарахти тегишли агротехник талабларга амал қилинмасдан Тошкент вилояти Ўртачирчиқ туманига кўчириб ўтқазилгани аниқланган.
Айни дамда мазкур ҳолат юзасидан Тошкент шаҳар прокуратураси томонидан Max Processing МЧЖ мансабдор шахслари ва бошқаларга нисбатан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 3-қисми ва 229-моддаси (ўзбошимчалик) билан жиноят иши қўзғатилган.
Изоҳ (0)