Рим шаҳридаги Квиринал саройида 8 июнь куни Шавкат Мирзиёев ва Италия президенти Сержо Маттарелланинг музокаралари бўлиб ўтди. Бу ҳақда "Дарё" мухбири хабар берди.
Унга кўра, давлат раҳбари ташриф билан келиш таклифи ва меҳмондўстлик учун миннатдорлик билдириб, Сержо Маттарелла ва Италия халқини куни кеча ўтган миллий байрам – Республика эълон қилинган кун билан қутлади.
Италия президенти Янги Ўзбекистонда амалга оширилаётган ислоҳотларни қўллаб-қувватлашини билдирди ҳамда мамлакатнинг Марказий Осиёда барқарорлик ва фаровонликни таъминлаш борасидаги саъй-ҳаракатларини юқори баҳолади. Давлат раҳбарлари иқтисодий ҳамкорлик масалаларини кўриб чиқди.
Қайд этилишича, кейинги йилларда ўзаро товар айирбошлаш ва қўшма корхоналар сони икки баробар кўпайди. Мамлакатда Pietro Fiorentini, Terra-nova, Danieli, Imagro, Ansaldo, Saipem каби етакчи компаниялари муваффақиятли фаолият юритмоқда.
Президентлар куни кеча ўтган бизнес-форум натижаларини мамнуният билан қайд этди. Унинг якунида умумий қиймати 9 миллиард евродан зиёд бўлган келишув ва шартномаларнинг салмоқли тўплами имзоланди. Гуманитар алоқаларни ривожлантиришга алоҳида эътибор қаратилди. Ўзбекистон ва Италиянинг маданий-тарихий меросига бағишланган кўргазма ташкил этишга келишиб олинди.
Бундан ташқари, таълим, археология, экологик хатарларга қарши курашиш соҳаларида ҳамкорлик қилиш истиқболлари муҳокама қилинди. Тошкентда Турин ва Пиза университетларининг филиаллари муваффақиятли ишламоқда. Кетма-кет уч йил Ўзбекистон Венециядаги Халқаро биенналеда иштирок этиб келмоқда.
Етакчилар минтақавий ва халқаро аҳамиятга молик масалалар, энг аввало, Афғонистондаги вазият юзасидан ҳам фикр алмашди. Афғон халқига манзилли гуманитар ёрдамни давом эттириш ҳамда махсус вакилларнинг маслаҳатлашувларини мунтазам ўтказиш муҳимлиги таъкидланди.
Учрашув якунида Шавкат Мирзиёев Сержо Маттареллани мамлакатга расмий ташриф билан келишга таклиф этди.