АҚШ Ямандаги “Ансор Аллоҳ” (ҳусийлар) ҳаракати нишонларига яна ҳужум қилди, деб хабар бермоқда CBS News Америка расмийларига таяниб. Уларнинг сўзларига кўра, зарба Қизил денгиздаги кемаларга ҳусийларнинг ҳужумлари сони ортиб бораётганига жавоб бўлган.
Яманнинг Ал-Масираҳ нашри хабарига кўра, АҚШ билан биргаликда Британия кучлари зарбалар бермоқда. Тўрт вилоят: Ал-Ҳудайда, Таиз, Дҳамар, Ал-Байда ва Саада шаҳри ҳужумга учраган.
Кейинроқ АҚШ Марказий қўмондонлиги (CENTCOM) Х ижтимоий тармоғида ҳусийларнинг 14 та ракета учирувчи қурилмасига зарба берилгани ҳақида хабар берди.
2023 йил охирида Яман ҳусийлари Ғазо секторидаги уруш учун қасос сифатида Исроилга алоқадор кемаларга ҳужум қилишини айтганди. Натижада энг йирик халқаро ташувчилар йўналишларини ўзгартиришга мажбур бўлди ва бўғоз тўсиб қўйилди.
19 декабрь куни Вашингтон Қизил денгизда тўсиқларсиз ва хавфсиз навигацияни таъминлашдан иборат бўлган “Фаровонлик қўриқчиси” операциясини эълон қилди. 12 январь куни АҚШ ва Буюк Британия халқаро коалиция кўмагида ядровий сувости кемасидан учирилган самолётлар ва “Томагавк” қанотли ракеталари ёрдамида Ямандаги ҳусий нишонларига ҳужум қилди. Бир кун ўтиб, ҳусийларга яна зарбалар берилди.
АҚШ Марказий қўмондонлиги маълумотларига кўра, 60 дан ортиқ ҳарбий объектларга зарба берилган. New York Times ёзишича, зарбалар 90 фоиз ҳолатда ўз мақсадларига эришган, аммо исёнчиларнинг ҳужум қобилиятини атиги 20-30 фоиз йўқ қилишга муваффақ бўлган.
Изоҳ (0)