AQSH Yamandagi “Ansor Alloh” (husiylar) harakati nishonlariga yana hujum qildi, deb xabar bermoqda CBS News Amerika rasmiylariga tayanib. Ularning so‘zlariga ko‘ra, zarba Qizil dengizdagi kemalarga husiylarning hujumlari soni ortib borayotganiga javob bo‘lgan.
Yamanning Al-Masirah nashri xabariga ko‘ra, AQSH bilan birgalikda Britaniya kuchlari zarbalar bermoqda. To‘rt viloyat: Al-Hudayda, Taiz, Dhamar, Al-Bayda va Saada shahri hujumga uchragan.
Keyinroq AQSH Markaziy qo‘mondonligi (CENTCOM) X ijtimoiy tarmog‘ida husiylarning 14 ta raketa uchiruvchi qurilmasiga zarba berilgani haqida xabar berdi.
2023-yil oxirida Yaman husiylari G‘azo sektoridagi urush uchun qasos sifatida Isroilga aloqador kemalarga hujum qilishini aytgandi. Natijada eng yirik xalqaro tashuvchilar yo‘nalishlarini o‘zgartirishga majbur bo‘ldi va bo‘g‘oz to‘sib qo‘yildi.
19-dekabr kuni Vashington Qizil dengizda to‘siqlarsiz va xavfsiz navigatsiyani ta’minlashdan iborat bo‘lgan “Farovonlik qo‘riqchisi” operatsiyasini e’lon qildi. 12-yanvar kuni AQSH va Buyuk Britaniya xalqaro koalitsiya ko‘magida yadroviy suvosti kemasidan uchirilgan samolyotlar va “Tomagavk” qanotli raketalari yordamida Yamandagi husiy nishonlariga hujum qildi. Bir kun o‘tib, husiylarga yana zarbalar berildi.
AQSH Markaziy qo‘mondonligi maʼlumotlariga ko‘ra, 60 dan ortiq harbiy obyektlarga zarba berilgan. New York Times yozishicha, zarbalar 90 foiz holatda o‘z maqsadlariga erishgan, ammo isyonchilarning hujum qobiliyatini atigi 20-30 foiz yo‘q qilishga muvaffaq bo‘lgan.
Izoh (0)