АҚШ президенти Жо Байден Ямандаги ҳусийлар нишонларига берилаётган ҳаво ҳужумлари зарурий чора эканини айтди. Унинг сўзларига кўра, зарбалар ҳусийларни тўхтатиш ва заифлаштириш учун қўлланган.
“АҚШ бу зарбаларни зарурий ва мутаносиб равишда, халқаро ҳуқуққа мос ва миллатнинг ўзини ҳимоя қилиш ҳуқуқидан фойдаланган ҳолда амалга оширди”, — деб ёзди Байден Сенат ва Вакиллар палатаси спикерларига йўллаган мактубида.
Унинг қўшимча қилишича, зарбалар ҳусийлардан келадиган хавфни чеклаш ва тинч аҳоли орасида қурбонлар бўлишининг олдини олиш мақсадида амалга оширилган.
Мурожаатда таъкидланганидек, зарба йўллаш тўғрисидаги қарорни Жо Байден мустақил равишда қабул қилган, чунки у АҚШнинг олий қўмондони, ижроия ҳокимияти раҳбари ва мамлакат ташқи сиёсати учун масъулдир. Қўшма Штатлар президенти “таҳдидларга қарши курашиш ва ҳужумларнинг олдини олишга” тайёрлигини эълон қилди.
12 январь куни АҚШ ва Буюк Британия Ямандаги 16 та ҳусийлар нишонларига жами 60 марта зарба берди. Бу зарбалар ҳусийларнинг Қизил денгиздаги савдо кемаларига ҳужумларининг кучайиши сабабли берилгани маълум қилинган.
Изоҳ (0)