Зеленский: “Украинанинг қуролга бўлган эҳтиёжини қондириш учун дунёдаги ишлаб чиқариш етарли эмас”

Украина президенти Владимир Зеленскийнинг айтишича, дунёда Украинанинг снарядлар ва қуролларга бўлган эҳтиёжини қондириш учун етарлича ишлаб чиқариш ҳажми йўқ.

Бу ҳақда давлат раҳбари Давосдаги Жаҳон иқтисодий форуми доирасидаги нутқи чоғида айтиб ўтди.

Президент Украина 155 мм калибрли артиллерия қурилмалари учун снарядлардан қандай ҳажмда фойдаланишини тушунтирди.

“Бизда ҳамма нарса етарли эмас. Улар бизга ҳамма нарсани текинга бермоқда, демайман. Баъзилари берилади, баъзилари эса сотилади — бунинг фарқи катта. Мен сизга ҳажм ҳақида айтмоқчиман: бугунги кунда дунёда етарли ҳажм йўқ. Масалан, юқорида айтганимдек, артиллерия ишлаб чиқариш ҳажми Украина армиясининг Россия армияси билан урушга бардош бериши учун етарли эмас”, — дея таъкидлади Зеленский.

У, шунингдек, Россия нима учун Шимолий Кореядан снарядлар олишини тушунтирди.

“Уларнинг ишлаб чиқариши камми? Йўқ, лекин етарли эмас. Етарли эмас. Шунинг учун улар бутун дунё бўйлаб снарядлар қидиришмоқда. Катта дефицит бор”, — деди Зеленский.

Унинг сўзларига кўра, бутун дунё кенг кўламли урушга тайёр эмас.