Тошкентда трейдерлик билан шуғулланишини айтиб, 52 ёшли аёлни 23 млн сўмга чув туширган шахс аниқланди

Тошкент шаҳрида фирибгарлик йўли билан ўзганинг пул маблағларини ўзлаштирган аёл аниқланди, деб хабар беради ИИВ Киберхавфсизлик маркази.

Қайд этилишича, Чилонзор туманида яшовчи 52 ёшли (аёл) Й.А. ИИОга мурожаат қилиб, банк картасидан 23 миллион сўм миқдоридаги пул маблағлари номаълум шахс томонидан фирибгарлик йўли билан ўзлаштирилганини маълум қилган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида мазкур жиноятни Учтепа туманида яшовчи 38 ёшли (аёл) Й.З. содир этгани аниқланган.

Унга кўра, Й.З. Telegram мессенжеридаги “trade_Inves” номли гуруҳ орқали танишиб, ўзини трейдерлик фаолияти билан шуғулланишини ва пулларини оз фурсатларда кўпайтириб беришини ваъда қилиб, алдов йўли билан 23 миллион сўм миқдоридаги пул маблағларини ўтказиб олишга эришган ва берган ваъдасини бажармасдан пулларни ўз эҳтиёжларига сарфлаб юборган.

Мазкур ҳолат юзасидан Жиноят кодексининг 168-моддаси (фирибгарлик) 3-қисми “г” банди билан жиноят иши қўзғатилиб, Й.З.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.

Аввалроқ Самарқандда икки аёлнинг номига 54 миллион сўм онлайн кредит расмийлаштирган сохта оператор қўлга олингани тўғрисида хабар берилганди.