Наманганда ўзганинг номига 15 млн сўм кредит расмийлаштирган банк иш бошқарувчиси аниқланди

Наманганда ўзганинг номига кредит расмийлаштирган банк иш бошқарувчиси аниқланди, деб хабар беради ИИВ Киберхавфсизлик маркази.

Қайд этилишича, Уйчи туманида яшовчи 50 ёшли аёл С.Н. ариза билан мурожаат қилиб, унинг номига розилигисиз 15 миллион 460 минг сўм кредит расмийлаштирилиб, ушбу миқдордаги пуллар банк картасига туширилиб, шу заҳоти бошқа банк картасига ўтказиб олинганини билдириб, айбдор шахсга қонуний чора кўришликни сўраган.

Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, ушбу жиноятни Уйчи туманида яшовчи 27 ёшли Б.Б. содир этгани аниқланган.

Маълум бўлишича, Б.Б. банк иш бошқарувчиси лавозимида ишлаб келиб, хизмат ваколатидан фойдаланган ҳолда фуқаро С.Н.нинг шахсий маълумотлари орқали унинг номига кредит расмийлаштириб, пулларни ноқонуний ўзлаштирган.

Мазкур ҳолат юзасидан Жиноят кодексининг 169-моддаси (ўғрилик) 1-қисми банди билан жиноят иши қўзғатилиб, Б.Б.нинг содир этилиб, фош этилмай қолган бошқа шу турдаги жиноятларга алоқадорлигини текшириш мақсадида тергов, тезкор-қидирув ҳаракатлари давом эттирилмоқда.

Бундан олдин Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.