“Съёмка жараёнида ўзимни ноқулай ҳис қилганман”. Муҳаммадисо Абдулхаиров “Улфатлар”да суратга тушишга Мурод Ражабовнинг таклифини рад этолмагани учун рози бўлгани ҳақида (фото)

Актёр Муҳаммадисо Абдулхаиров YouTube’даги “Нима гап” каналига берган интервьюсида “Улфатлар” фильмида суратга тушишни истамагани ва Instagram’га бегона инсон эканлиги ҳақида гапирди.

— Собир Назармуҳаммедовнинг “Девона” номли фильмидан кейин Мурод Ражабов билан анча яқинлашиб қолгандик. “Улфатлар” фильмига таклиф қилди. “Битта кино оламан, бош ролларда сен, мен, Эркин Комилов ва Мирзабек Холмедов бўлади”, деганда “Зўр команда ишларкан-да”, дегандим. Аммо кейин ҳаммамиз синфдош бўлишимиз ҳақида эшитиб “Ака, ғалати бўлади-ю” деб унда суратга тушишни истамаганман. “Нега унақа дейсан, кинода бўлаверади-ку. Ёки ялинишимни хоҳлаяпсанми?” деганларидан кейин ноилож рози бўлганман. Аммо суратга олиш жараёнларида ҳам ноқулайликни ҳис қилганман. Премьерага ўн кун қолганида ҳаяжоним шу қадар ортдики, кўзимга уйқу келмай қолди. “Эй, шунақа ҳам роль ўйнайсанми? Расво-ку!” деган гап-сўзга қолиб кетаман деб ўйлагандим. Премьера куни Мирзабек Холмедовга “Ака, мен саҳнага чиқиб, кейин тез кетиб қоламан. Сўрашса у бу нарса деб қўярсиз”, дегандим. Қочиб кетмаслигим учун Мирзабек ака қўлимдан маҳкам ушлаб турган. Аммо томошабинлар ролимни илиқ қабул қилган, ҳеч ким ёш ўртасидаги тафовутни сезмаган.

Аслида фильмдаги қаҳрамоним айтарли бир ишни қойиллатмаган. Ролнинг ўзига хослиги йўқ. Мурод аканинг қаҳрамони нима ишни буюрса ўшани қилади.

Фильм саккиз ой мобайнида кунига тўққиз сеансдан намойиш этилган. Фақатгина ўша фильмда 40 ёшдан юқори эркакларнинг улфат бўлиб кино кўришга келганини гувоҳи бўлдим. Чунки одатда киносаройга ёшлар ёки аёллар ташриф буюрарди.

Алишер Навоий номидаги киносаройнинг юқори қаватида томошабинларни кузатиш мумкин. Ўша ерга чиқиб, одамларнинг эмоциясини кузатардим. Бу ниҳоятда завқли эди, — дейди Муҳаммадисо Абдулхаиров.

Актёрни Instagram тармоғида 623 минг кузатувчиси бор. Аммо актёр уни ўзи юритмаслиги ва ижтимоий тармоқлардан бутунлай йироқ эканлигини яширмади.

— Instagram’дан бутунлай йироқ одамман. Ҳатто, ҳалигача оддий телефондан фойдаланаман. Instagram’даги аккаунтимни ёпиб ҳам юбормоқчи бўлдим. Аммо ҳеч бўлмаса шу ердан тирикчилик қилиб турибмиз-ку, деб ўчирмадим. Баъзида дўкон очилиши бўйича рекламаларга таклиф қилишади. Аввалгидек кинолар йўқ, баъзида сериалларга таклиф этишади, холос. Instagram’даги аккаунтимни ўзим юритмайман, админлар бор. Ўзим Instagram’да узоғи 30-40 дақиқа ўтира оламан, холос. Мен тўйга чиқмайман, Instagram’дан бир-икки сўм пул келиб тургани учун ундан фойдаланяпман, — дейди актёр.