Aktyor Muhammadiso Abdulxairov YouTube’dagi “Nima gap” kanaliga bergan intervyusida “Ulfatlar” filmida suratga tushishni istamagani va Instagramga begona inson ekanligi haqida gapirdi.
— Sobir Nazarmuhammedovning “Devona” nomli filmidan keyin Murod Rajabov bilan ancha yaqinlashib qolgandik. “Ulfatlar” filmiga taklif qildi. “Bitta kino olaman, bosh rollarda sen, men, Erkin Komilov va Mirzabek Xolmedov bo‘ladi”, deganda “Zo‘r komanda ishlarkan-da”, degandim. Ammo keyin hammamiz sinfdosh bo‘lishimiz haqida eshitib “Aka, g‘alati bo‘ladi-yu” deb unda suratga tushishni istamaganman. “Nega unaqa deysan, kinoda bo‘laveradi-ku. Yoki yalinishimni xohlayapsanmi?” deganlaridan keyin noiloj rozi bo‘lganman. Ammo suratga olish jarayonlarida ham noqulaylikni his qilganman. Premyeraga o‘n kun qolganida hayajonim shu qadar ortdiki, ko‘zimga uyqu kelmay qoldi. “Ey, shunaqa ham rol o‘ynaysanmi? Rasvo-ku!” degan gap-so‘zga qolib ketaman deb o‘ylagandim. Premyera kuni Mirzabek Xolmedovga “Aka, men sahnaga chiqib, keyin tez ketib qolaman. So‘rashsa u bu narsa deb qo‘yarsiz”, degandim. Qochib ketmasligim uchun Mirzabek aka qo‘limdan mahkam ushlab turgan. Ammo tomoshabinlar rolimni iliq qabul qilgan, hech kim yosh o‘rtasidagi tafovutni sezmagan.
Aslida filmdagi qahramonim aytarli bir ishni qoyillatmagan. Rolning o‘ziga xosligi yo‘q. Murod akaning qahramoni nima ishni buyursa o‘shani qiladi.
Film sakkiz oy mobaynida kuniga to‘qqiz seansdan namoyish etilgan. Faqatgina o‘sha filmda 40 yoshdan yuqori erkaklarning ulfat bo‘lib kino ko‘rishga kelganini guvohi bo‘ldim. Chunki odatda kinosaroyga yoshlar yoki ayollar tashrif buyurardi.
Alisher Navoiy nomidagi kinosaroyning yuqori qavatida tomoshabinlarni kuzatish mumkin. O‘sha yerga chiqib, odamlarning emotsiyasini kuzatardim. Bu nihoyatda zavqli edi, — deydi Muhammadiso Abdulxairov.
Aktyorni Instagram tarmog‘ida 623 ming kuzatuvchisi bor. Ammo aktyor uni o‘zi yuritmasligi va ijtimoiy tarmoqlardan butunlay yiroq ekanligini yashirmadi.
— Instagramdan butunlay yiroq odamman. Hatto, haligacha oddiy telefondan foydalanaman. Instagramdagi akkauntimni yopib ham yubormoqchi bo‘ldim. Ammo hech bo‘lmasa shu yerdan tirikchilik qilib turibmiz-ku, deb o‘chirmadim. Baʼzida do‘kon ochilishi bo‘yicha reklamalarga taklif qilishadi. Avvalgidek kinolar yo‘q, baʼzida seriallarga taklif etishadi, xolos. Instagramdagi akkauntimni o‘zim yuritmayman, adminlar bor. O‘zim Instagramda uzog‘i 30-40 daqiqa o‘tira olaman, xolos. Men to‘yga chiqmayman, Instagramdan bir-ikki so‘m pul kelib turgani uchun undan foydalanyapman, — deydi aktyor.
Izoh (0)