“Instagram’да битта пост 18 минг долларга тушган”. 29 ёшли блогер ва тадбиркор Жаҳонгир Хўжаев 120 минг долларлик машинаси, бизнеслари ва даромади ҳақида сўзлаб берди

Сариқ бола тахаллуси билан танилган блогер ва тадбиркор Жаҳонгир Хўжаев адаши Жаҳонгир Латиповга берган интервьюсида қимматбаҳо машинаси, бизнеслари ва ҳозирги кунда қанча пул топаётгани ҳақида сўзлаб берди.


120 минг долларлик Mercedes

— CLS 300 автомобилини 120 минг долларга харид қилдим. Биринчи машинам Mercedes бўлган. Жуда қийналиб йиғиб, зўрға олганман. Ўшани биринчи Giv’га қўйиб, кўзимда ёш билан бериб юборганман. Ўшанда ҳали кўп пул топиб, албатта Mercedes оламан, деб ният қилганман. Ҳозирда бу машинамни сотиб, кроссовер олишни режа қиляпман.

Бизнеслари

— Мени Instagram боқяпти. Пицца ҳам яхши даромад олиб келади. Лекин ундан тушган пулни ишлатмайман. Чунки бу йил камида 10 та янги филиал очмоқчиман. Битта филиал ойига 5000 дан 10 минг долларгача даромад олиб келади. Ҳар битта “точка”га 100 мингдан 150 минггача пул сарфланади. Шунинг учун пиццадан тушаётган пулни уни ўзини ривожлантиришга ишлатаман. Пиццахоналарда ҳозир 300 дан ортиқ киши ишлайди.

Instagram’дан қанча топади?

— Instagram’да битта ўзим реклама қиладиган бўлсам Stories 1000, лента 3,500 доллар. Айримлар маҳсулот рекламасига Асал ҳам суратга тушишини сўрайди. Унда битта пост нархи 6,500-7000 долларгача ошади, Stories ҳам қимматроқ бўлади. Агар реклама съёмкасида “Аристоркатлар”дан Диёр ёки Сарвар иштирок этса, нарх янада қимматлашади. Мана, масалан, жамоа бўлиб олган рекламамиз бор, Mediapark учун ишланган ушбу видеони 18 минг долларга сотдик.

Аёли қанча пул топади?

— Асал Instagram’га умуман қизиқмайди. Уйда бола тарбияси билан банд. Лекин мухлислар Хўжаевлар оиласи вайнимизни сўрашса, бирга ижод қилиб турамиз. Асал топган пулини ўзига ишлатади. Косметикасига ёки айланишга сарфлайди. Мендан умуман пул сўрамайди. Оила харажатлари менинг зиммамда, лекин у ҳамма харажатларига ўзи ишлаб топади. Масалан, яқинда ўзига KIA К5 харид қилди. Хотиним пулимни “шилмагани” учун бизнесим ривожланяпти.

Giv’лар ҳақида

— Giv танловлар катта даромад олиб келади. Ҳозиргача мендан бошқа ҳеч ким 1 миллион обуначи тўплаб бермаган шоу-бизнесда. Буни мақтаниш учун айтмаяпман. Мен ростдан ҳам ҳаммага автомобиль бердим, вилоятларга ўзим бориб топшириб келдим. Лекин сўнгги пайтларда фейк аккунтлар кўпайиб кетгани учун бошқа Giv қилмасликка қарор қилдим. Бу жуда кўп кучни олади.

Бир ойда қанча пул ишлатасиз?

— Даромадларимнинг асосий қисмини саёҳатга ишлатаман, яхши овқатланаман, соғлигимга қарайман. Пулни ўзимдан қизғанмайман. Топаётган пулимга яраша маза қилиб яшайман.