Шимолий Корея бошқариладиган каллакка эга ўрта масофага мўлжалланган гипертовушли баллистик ракетани синовдан ўтказди, деб хабар бермоқда KCNA Шимолий Корея давлат агентлиги.
“Синов учириш ўрта масофага мўлжалланган гипертовушли бошқариладиган жанговар каллакнинг сирпаниш ва манёвр парвоз хусусиятларини ҳамда янги кўп босқичли оғир юк кўтарувчи қаттиқ ёқилғи реактив двигателларининг ишончлилигини тасдиқлашга қаратилган”, — дейилади KCNA томонидан эълон қилинган баёнотда.
Жанубий Кореянинг Yonhap агентлиги хабар беришича, ракета КХДР ҳудудидан Япон денгизи томон учирилган, минг километрга яқин масофани босиб ўтиб, денгизга қулаган.
Жанубий Корея Мудофаа вазирлиги КХДР томонидан ўтказилган синовларни қоралаб, Шимолий Кореянинг тўғридан тўғри провокацияларига тегишли жавоб берилишини таъкидлади, деб ёзади Reuters.
Агентлик қайд этишича, ракета синовлари Шимолий Корея ташқи ишлар вазири Чве Сон Хи бошчилигидаги делегация расмий ташриф билан Москвага борган куни амалга оширилган.
Шимолий Корея ва Россия рус қўшинларининг Украинага кенг кўламли босқини фонида икки томонлама, жумладан, қурол-яроғ соҳасидаги ҳамкорликни мустаҳкамлади. Хусусан, Ғарб манбалари КХДР Россияга Украинадаги жангларда фойдаланиш учун ўқ-дорилар етказиб бераётганини даъво қилмоқда.
Шимолий Корея 2021 йилда гипертовушли қуролларнинг биринчи синовларини эълон қилганди.
Изоҳ (0)