Корея Меҳнат партияси марказий қўмитаси бўлим мудири Ким Ё Чен (КХДР раҳбари Ким Чен Иннинг синглиси) БМТ Хавфсизлик кенгаши ва АҚШни мамлакат ички ишларига аралашишда айблади.

Аввалроқ Оқ уй баллистик ракеталарнинг коинотга учирилиши БМТ томонидан тақиқланганини эслатиб ўтган эди.

“Бирлашган Миллатлар Ташкилоти Хавфсизлик Кенгаши Қўшма Штатлар илтимосига кўра, КХДРни суверен давлат сифатидаги ҳуқуқларини амалга ошириш учун тез-тез жавобгарликка тортаётганидан жуда норозиман ва мен буни энг адолатсиз ва нохолис иш деб қоралайман. Бу мамлакатнинг ички ишларига аралашиш ва суверенитетини бузишга ҳаракат ҳисобланади”, — деди Ким Ё Чен.

Айни пайтда Шимолий Кореянинг халқаро масалалар бўйича таҳлилчиси Ким Мюнг-Чул Халқаро денгиз ташкилотининг (ИМО) ракета учирилиши ҳақидаги олдиндан хабар беришидан Шимолий Кореяга қарши кампанияни кучайтириш учун фойдаланилганини айтди. Унинг сўзларига кўра, келажакда Пхеньян ташкилотни ракета учирилиши ҳақида хабардор қилмайди.