Ўзбекистонда ҳафта охирларига бориб ҳарорат кўтарилади

Ўзбекистон ҳудудига 15 январь куни нам ва нисбатан совуқ ҳаво массалари кириб келди, деб хабар бермоқда “Ўзгидромет”.

16 январь, сешанба куни фақат республиканинг марказий, шарқий ва тоғли ҳудудларида ёмғир ва қор кўринишидаги бир оз ёғингарчилик бўлиши сақланиб туради. Ўзбекистоннинг қолган ҳудудларида ёғингарчиликсиз об-ҳаво кузатилади.

Кўпчилик ҳудудларда ҳаво ҳарорати кечаси 0-5 даража совуққача пасаяди, кундузи 2-7 даража илиқни ташкил этади, шимолда кечаси 8-13 даража совуқ, кундузи 0-5 даража совуқ бўлади.

15—16 январь кунлари Тошкент ва Наманган вилоятларининг тоғли ҳудудларида қор кўчиши хавфи бор. Ўзбекистон бўйича иш ҳафтасининг охиригача қуруқ об-ҳаво бўлиши кутилмоқда, ҳаво ҳарорати кечалари 3 даража совуқ-2 даража илиқни ташкил этади, кундуз кунлари 8-13 даража илиққача аста-секин кўтарилиши кутилмоқда.

Тошкентда 15 январь куни вақти-вақти билан ёғингарчилик (ёмғир, қор) бўлади. Ҳарорат 1 даража совуқ-1 даража илиқ бўлади.

16 январда вақти-вақти билан бир оз ёғингарчилик (ёмғир, қор) бўлиши кутилмоқда. Кечаси ва эрталаб туман тушиши мумкин. Ҳарорат кечаси 1-3 даража совуқ, кундузи 2-4 даража илиқ бўлади.

17—18 январь кунлари ёғингарчилик кутилмайди. Кечаси ва эрталаб туман тушиши мумкин. Ҳаво ҳарорати 17 январда кечаси 1-3 даража совуқ, кундузи 6-8 даража илиқ, 18 январда кечаси 1 даража совуқ-1 даража илиқ, кундузи 8-10 даража илиқ бўлади.