Қашқадарё вилояти ҳокими Муроджон Азимов раҳбарлигидаги йиғилишда Чироқчи тумани ҳокими Файзулла Юсупов жазоланди. Бу ҳақда ҳокимлик ахборот хизмати раҳбари Аҳрор Содиқов хабар тарқатди.
Вилоят ҳокими Муроджон Азимов раҳбарлигида ўтказилаётган ҳокимлик соатида берилган топшириқлар ижросини таъминлашда назоратни сусайтириб юборгани ҳамда хато ва камчиликларга йўл қўйгани учун Чироқчи тумани ҳокими Файзулла Юсуповга нисбатан Меҳнат кодексининг тегишли моддаларига асосан “ҳайфсан” интизомий жазо чораси қўлланилди, — дейди Аҳрор Содиқов бу ҳақда ёзар экан.
Файзулла Юсупов Чироқчи туманига 2023 йилнинг август ойидан бери раҳбарлик қилиб келади. У жамоатчиликка сўконғичлиги билан яхши танилганди.
Молия бошқармаси бошлиғи сифатида фаолият юритган Файзулла Юсупов 2022 йилда ходимларини ҳақорат қилиб, кўпчилик эътиборини тортганди.
Мазкур аудиоёзувда собиқ бошқарма бошлиғи, айни кунда ҳокимлик қилаётган Юсуповнинг “Ўзингни ўзинг оссанг бўлмайдими?”, “Замон тўғри келганда пешонангдан отардим”, “Аёллар, кўкрагингни очиб юрма бу ерда. Ҳеч ким сенинг кўкрагингни кўраман деб келаётгани йўқ, бошқа жойда очиб кўрсат”, “Ҳокимингга чиқаман, қани бир минутда жазолаб бермасин-чи, сендақа молия мудирчаларини”, деган гаплари янграганди.
Ўша пайтда мазкур ҳолатга изоҳ берган масъуллар воқеа 2021 йил вилоят ҳокимининг собиқ биринчи ўринбосари Нодир Эркаев раҳбарлигида муҳокама қилинганини ва иш фаолиятида ходимларига нисбатан одоб-ахлоқ нормаларига амал қилмаган ҳолда, уларни ҳақорат қилган Файзулла Юсупов қатъий огоҳлантирилганини очиқлаганди.
Изоҳ (0)