Ўзбекистонда ҳаво ҳарорати совий бошлади. Айрим ҳудудларда қор ва ёмғир ёғмоқда

Бугун, 14 январь куни Навоий вилоятининг Зарафшон шаҳри ва Қорақалпоғистон Элликқалъа туманида қор ёғди. Шу билан бирга, Тошкент шаҳрида ҳам (соат 22:20 ҳолатига) ёмғир ёғмоқда.

“Ўзгидромет” хабарига кўра, 14 январь соат 20 дан 15 январь соат 20 гача Ўзбекистоннинг деярли барча ҳудудларида (Қорақалпоғстон ва Хоразмдан ташқари) ёғингарчилик бўлиши кутилмоқда. Хусусан, жануб, шимол ва водий вилоятларидан ташқари жойларда ёғаётган ёмғир қорга айланиши мумкин.

Прогнозларга қараганда, 15 январь куни Қорақалпоғистон ва Хоразмда совуқ антициклон таъсирида тунда ҳаво ҳарорати -10, -15 даража совуқ бўлади. Кундузи ҳам ҳарорат нол даражадан анча паст сақланади. Бу совуқлик тўлқинлари Бухоро ва Навоий вилоятларига ҳам сезиларли таъсир этади. Бошқа вилоятларда (жануб ва водийдан ташқари) эса совуқлик тўлқини ҳароратни минус 3 даражагача пасайтириши мумкин.

Иқлимшунос Эркин Абдулаҳатовнинг ёзишича, совуқ оқимлар ўтмишдошлари каби минтақада (шимолий ҳудудлардан ташқари) ҳароратни манфий, тупроқни музлатадиган даражада пасайтира олмаяпти.

“Эл-Нинё фенемони минтақага кучли таъсир этмоқда. Афсуски, 16-17 январь кунлари республиканинг кўплаб тоғ этакларида куртакларда гуллаш ва бўртиб қолиш фазасига кириб қолган мевали дарахтларни совуқ уради”,—дея фикр бидирди мутахассис.

Навоий вилоятининг жанубий туманларида 16-17 январь кунлари тунда ҳаво ҳарорати -7 даражагача совуқ бўлади.

“Бу ҳудудларда гуллашга кириб бораётган ва куртаклари бўртиш фазага учраган мевали дарахтларни совуқ уришига олиб келади. Бошқа дарахтларда ҳам мазкур совуқлик омил таъсири сезилади”, —дея қўшимча қилди тадқиқотчи.

Қиш илиқ келиши ортидан Ўзбекистон тоғ этакларидаги бодом, ўрик, шафтолилар гуллай бошлагани хабар қилинганди. Ҳавонинг илиши дарахтларни қишки уйқуга кетадиган пайтда гуллатиб юборса, бирдан совуқ бўлиши ортидан бевақт “уйғониб”, гуллаб юборган дарахтлар ҳосилидан айрилади.

“Ўзгидромет” бўлим бошлиғи Ҳумоюн Мағриповнинг айтишича, қиш якунигача 3-4 кун қор ёғадиган, ҳарорат 0 даражадан пастга тушадиган ҳолатлар бўлади.

“Аслини олганда, январь ойи совуқ келгани яхши. Негаки, илиқ келган қишнинг оқибатлари кейинги йил баҳор ва ёзда билинади ҳамда у жуда оғир асоратларни келтириб чиқаради. Масалан, қишлоқ хўжалиги ва яйловлар учун оғир шароит юзага келади”, — деди мутахассис.

Мевалар ва сабзавотларнинг қай даражада ҳосил бериши келгуси ҳаво ҳароратларига боғлиқ бўлиб қолмоқда.