Ҳиндистон қўмондонлиги Кунлун ва Ҳимолай тоғ тизимлари оралиғида жойлашган Ladaкха туманида Хитой билан чегарани мустаҳкамлаш доирасида турли разведкачи дронлар ва кузатув тизимларини сотиб олишни бошлади. Бу ҳақда Times оф Индиа хабар берган.
«Ҳаракат радиуси 15—20 километрдан 60—90 километргача бўлган масофадан бошқарилувчи янги кичик учувчисиз учар қурилмалар баланд тоғли туманларда ёпиқ позициялардан ўқ отиш учун разведка олиб бориш мақсадида артиллерия қисмларига керак. Агар улар ўзини яхши томондан кўрсаца, армия уларни катта миқдорда сотиб олади», — деди нашр манбаси.
Хусусан, армия энг яқин вақт ичида 80 та учувчисиз учар қурилма, 10 та автоном учар қурилма, 44 та модернизацияланган узоқ радиусли кузатув тизимлари ва навигация тизимлари учун буюртмалар бермоқчи.
Аввалроқ, сентябрь ойида Ҳиндистон қўмондонлиги камикадзе-дронлар ва автоном разведкачи-зарбдор дронлар сотиб олиш нияти маълум бўлган эди.
Шунингдек, Ҳиндистон қуруқлик қўшинлари қўмондони Манож Панде Ladaкханинг шарқий ҳудудларида ҳарбий инфратузилма фаол равишда кенгайтирилаётганини маълум қилганди. Хусусан, 35 минг ҳарбий хизматчи учун турар-жой, 450 та танк ва бошқа зирҳли техникани жойлаштириш учун базалар қурилмоқда, шунингдек, 350 та турли артиллерия аслаҳалари ва гаубицалар кўчириб ўтказилган.
Ҳимолай тоғларида Ҳиндистон ва Хитой ўртасида аниқ демаркация қилинган чегара йўқлиги туфайли, кўп сонли низолар юз берган. Иккала томон тўқнашувлар учун жавобгарлик бир-бирига юклаган.
Ladaкхада вазият кескинлашуви 2020 йил майида Хитой ва Ҳиндистон ҳарбийлари ўртасидаги низолар билан бошланган. Натижада иккала томон ҳам чегарадаги ҳарбий иштирокини кучайтирган.
Чегара бўйича баҳслар
Ҳиндистон ва Хитой чегарасидаги демаркация чизиғи 1962 йилда, чегара урушидан кейин ўтказишган, унинг узунлиги 4 минг километрдан ошади. Чизиқ бўйича икки давлатнинг ҳақиқий чегараси ўтади, аммо ушбу ҳудудда улар ўртасида умумий тан олинган чегара йўқ, томонлар бу ҳудуд борасида баҳслашиб келади.Май ойида Ҳиндистон ТИВ Ню-Дели Пекин томонидан босиб олинган деб ҳисоблайдиган баҳсли ҳудудда Хитой Пангонг кўлини кесиб ўтувчи иккинчи кўприкни қураётганини маълум қилганди. Июнда АҚШнинг Тинч океанидаги қуруқлик қўшинлари қўмондони Чарльз Флинн Ҳиндистонга ташрифи чоғида Хитой томонидан Ҳиндистон билан чегарада ҳарбий инфратузилма ривожлантирилишини «хавотирли» ва «ибратли» деб атаган эди. Хитой ўшанда америкалик генералнинг ташрифини «алангани пуфлаб кучайтириш»га уриниш деб баҳолаган эди.
Хитой ва Ҳиндистон ҳарбийлари ўртасида бир неча марта тўқнашувлар юз берган, уларнинг сўнггиларидан бири 2020 йил июнида бўлиб ўтганди. Жанг қарийб олти соат давом этган, ўқотар қуроллар эмас, фақат таёқ, тош ва михли дубинкалар қўлланилган. 20 нафар ҳинд ҳарбийси ҳалок бўлган, Хитой томонидаги қурбонлар сони номаълум. Ҳиндистон ТИВ воқеада Хитойни айблаган.
Ўтган йил декабрида Пентагон демаркация чизиғи яқинида хитойлик ҳарбийлар тўпланганини қайд этган, бу идора ходимларида хавотир уйғотган эди. Ташвишга Хитой стратегик бомбардимончиларининг чегара яқинига жойлаштирилиши сабаб бўлган. Вашингтон Ню-Дели билан «барча даражаларда» мулоқот олиб бормоқда, АҚШ Ҳиндистон билан Хитой ҳарбийларининг ҳаракатланиши ҳақидаги разведка маълумотлари билан кўпроқ бўлиша бошлади.
Изоҳ (0)