Украина ҳукумати хориждан молиялаштирилмаса, пенсия тўлай олмайди, бу кекса одамларнинг ҳаётига таҳдид солади, деди Украина президенти Владимир Зеленский Латвияга ташрифи чоғида.
“Биз жуда кўп нарсаларни ўз пулимизга сотиб оламиз, лекин молиялаштириш бўлмаганда-чи. Биз пенсионерларга пул топиб беролмай қоламиз. Мен раҳмларингни келтирмоқчи эмасман, пенсиясиз қариялар шунчаки ўлиб кетишади. Бизда пенсионерлар 11 миллион нафар. Европада шунча қарияга эга бошқа бирорта давлат борми?”, — деган Украина президенти.
Агар Қўшма Штатлардан ёрдам келмаса, январь ойидаёқ ижтимоий ва гуманитар тўловлар билан боғлиқ муаммолар пайдо бўлиши мумкин, деб огоҳлантирганди Олий Рада бюджет қўмитаси раҳбари Роксолана Подласа бир ой олдин. Президентнинг “Халқ хизматкори” партиясидаги манба аниқлик киритишича, январь ойидаги камомад 20 миллиард гривнага етиши мумкин, 2024 йил учун умумий бюджет тақчиллиги 1,57 триллион гривнани ташкил қилади.
Украина 1 март санасидан олдин Ғарб ёрдамини олмаса, ушбу ойга режалаштирилган пенсияларни индексация қилиш, бекор қилиниши мумкин, деб айтганди ижтимоий сиёсат вазири Оксана Жолнович декабрь ойида.
Financial Times газетасининг ёзишича, Украинанинг 2024 йилги бюджетида 41 миллиард долларлик камомад мавжуд бўлиб, бу камомад Ғарбнинг молиявий кўмаги билан қопланиши режалаштирилган. Шундай қилиб, Киев Европа Иттифоқидан 18 миллиард доллар, АҚШдан 8,5 миллиард, ХВЖдан 5,4 миллиард доллар олишни, қолган маблағни Британия ва тараққиёт банкларидан олишни кутмоқда.
Изоҳ (0)