Пентагон раҳбари Ллойд Остин Ямандаги ҳусий нишонларига зарба беришни касалхонада ётган ҳолда буюрди ва ҳужумларни назорат қилди. У “хавфсиз алоқа воситалари тўпламидан фойдаланиб” бунга муваффақ бўлган, дея хабар берди CNN Пентагоннинг юқори мартабали мулозимига таяниб.
“Бугун вазир Остин CENTCOM (АҚШ Қуролли кучлари Марказий қўмондонлиги)га зарбалар тўғрисида буйруқ берди ва хавфсиз алоқаларнинг тўлиқ тўплами орқали реал вақт режимида вазиятни кузатиб борди”, — деди у 12 январга ўтар кечаси.
Қўшимча қилинишича, зарбалардан сўнг у Миллий хавфсизлик кенгаши, CENTCOM раиси ва қўмондони билан зарбалар таъсирини баҳолаш ҳақида гаплашган.
Эслатиб ўтамиз, ҳозирда Остин касалхонада простата саратонидан даволанмоқда. Мудофаа расмийсининг айтишича, 9—11 январь оқшомлари орасида Остин Жо Байден билан икки марта гаплашган ва президент маъқуллаган вариантни муҳокама қилиш учун штаб бошлиқлари бирлашган раиси Чарльз Браун, АҚШ Марказий қўмондонлиги қўмондони генерал Эрик Курила ҳамда Миллий хавфсизлик кенгаши билан “бир неча бор қўнғироқлашган”.
“Ўтган 72 соат ичида у бугунги зарбаларни назорат қилиш ва бошқаришда фаол иштирок этди”, — деди мудофаа вакили.
12 январга ўтар кечаси АҚШ ва Буюк Британия Ямандаги ҳусий объектларига зарбалар берди. Улар Яман ҳусийларининг Қизил денгиздан ўтаётган кемаларга давомли ҳужумлари сабаб уларни зарарсизлантиришга қарор қилган.
Изоҳ (0)