Экология, атроф-муҳитни муҳофаза қилиш ва иқлим ўзгариши вазирлиги “Ўзбекистон ҳудудида чиқиндилар, айрим турдаги хавфли маҳсулот ва кимёвий моддалар муомаласи билан боғлиқ назоратни янада такомиллаштириш чора-тадбирлари тўғрисида”ги қарори лойиҳасини муҳокамага қўйди.
Қарор лойиҳасида Базел конвенциясига мувофиқ, 27 турдаги хавфли чиқиндиларнинг Ўзбекистон ҳудудига олиб кирилишини тақиқлаш, импорт ва экспорт қилиниши давлат томонидан тартибга солинадиган ва мажбурий экологик сертификатланиши лозим бўлган хавфли маҳсулот ва чиқинди турлари рўйхатини тасдиқлаш кўзда тутилмоқда.
Вена конвенциясига кўра, Ўзбекистонга импорт қилиниши тақиқланган озонни бузувчи моддалар ва таркибида улар мавжуд бўлган маҳсулотларнинг янгиланган рўйхати, импорт ва экспорт қилиниши давлат томонидан тартибга солинадиган ва мажбурий экологик сертификат бўйича амалга ошириладиган озонни бузувчи моддалар ва таркибида улар мавжуд бўлган маҳсулотларнинг янгиланган рўйхати тасдиқланади.
Шунингдек, 2024 йил 1 июлдан бошлаб, озонни бузувчи моддалар ва таркибида улар мавжуд бўлган ёки улардан фойдаланишга мўлжалланган маҳсулотларни импорт ва экспорт қилиш экологик сертификат асосида фақат “Ягона дарча” божхона ахборот тизими орқали амалга оширилади.
Ozonни бузувчи моддаларнинг импорти учун квоталар электрон онлайн-аукцион савдолари орқали реализация қилиниши йўлга қўйилади.
Стокгольм конвенциясига мувофиқ 32 турдаги ўсимликларни ҳимоя қилиш воситалари ва бошқа турғун органик ифлослантирувчи моддаларни Ўзбекистон ҳудудига олиб кирилиши тақиқланади.
Экология вазирлиги уч ой муддатда хорижий тажриба асосида чиқиндиларни утилизация қилиш ва қайта ишлаш фаолиятини лицензияланадиган фаолият турлари рўйхатига киритишни назарда тутувчи қонун лойиҳасини Вазирлар Маҳкамасига киритади.
Аввалроқ Тошкент, Ангрен, Андижон, Бухоро ва Термиз шаҳарларида ҳамда Тошкент туманидаги кўп қаватли уйлар жойлашган ҳудудлардаги чиқинди йиғиш майдонларида “қайта ишланадиган” тоифага мансуб чиқинди турлари сотиб олиш йўли билан қабул қилиниши тўғрисида хабар берилганди.
Изоҳ (0)