Сўнгги кунларда Ливан-Исроил чегарасидаги вазият сезиларли даражада ёмонлашди. “Ҳизбуллоҳ” Исроилдаги радар станциясини ракета билан ўққа тутди, Исроил эса гуруҳ етакчиларидан бири Виссам ат-Тавилни дрон билан ўлдирди.
Вазиятнинг кескинлашиши туфайли Исроил мудофаа кучлари урушда ғайриоддий техникани — энг йирик ҳаво кемаларидан бири ҳисобланган “Тал Шамайим” дирижаблини ишга туширди. Бу ҳақда Bild хабар берди.
“Тал Шамайим” замонавий радар тизими билан жиҳозланган, шунинг учун у келаётган узоқ масофали ракеталар, қанотли ракеталар ва дронларни аниқлай олади. Дирижабл уч километр баландликка кўтарилиши ва уч тоннадан ортиқ юкни кўтариши мумкин.
Исроил ҳаво кучлари Американинг TCOМ компаниясига “Тал Шамайим”га буюртма берган ва уни 2022 йилда қабул қилиб олган.
“Ҳаво кучлари шимолий амалиётда жиддий таҳдидларга дуч келмоқда. Биз ҳар қандай сценарийга тайёр бўлишимиз керак. Янги тизим мавжуд ҳаво кузатуви имкониятларига муҳим қўшимча бўлиб хизмат қилади”, — деди Исроил ҳаво кучлари қўмондони генерал майор Амикам Норкин.
Исроил мудофаа вазири Йоав Галант, ўз навбатида, агар “Ҳизбуллоҳ” Ливан билан чегарадаги Исроил жамоаларига ракета зарбаларини тўхтатмаса, Исроил кейинги ҳарбий ҳаракатлардан қочмаслигини аниқ айтди.
Изоҳ (0)