Европа Иттифоқи давлатлари жорий йилнинг март ёки апрелигача Украинага 1 миллион артиллерия ўқ-дориларини етказиб бериш бўйича ўз мажбуриятларини бажара олади. Бу ҳақда Европанинг ички бозор бўйича комиссари Терри Бретон маълум қилди.
“Мен шуни ишонч билан айтмоқчиманки, биз ўз мажбуриятларимизни бажарамиз”, — деди Европа комиссари. Унинг сўзларига кўра, март ойи охиригача Украинага 1 миллион ўқ-дори етказиб беришнинг амалда имкони бор.
Шу мақсадда Европа комиссари Европа Иттифоқи давлатларини бошқа давлатларга қурол экспортини камайтириш ва ҳарбий-саноат комплексидаги компанияларга босим ўтказишга чақирди. Унинг прогнозларига кўра, Европа Иттифоқи икки йил ичида қурол ишлаб чиқариш бўйича Россияга етиб олиши мумкин.
Ноябрь охирида Европа кенгаши раҳбари Чарльз Мишел Европа Иттифоқи давлатлари раҳбарлари Украинага тўрт йил давомида 50 миллиард евро маблағ ажратиш бўйича бир тўхтамга кела олмаётганини айтганди.
Украинага АҚШдан кейин иккинчи йирик қурол етказиб берувчи Германия ҳисобланади. Декабрь ойи бошида Германия Мудофаа вазирлиги раҳбари Борис Писториус Украинага қурол етказиб беришда кечикишлар мавжудлигини тасдиқлади, аммо мудофаа саноати ишлаб чиқаришни ошираётганига ишонтирди.
Изоҳ (0)